మెగాస్టార్ చిరంజీవి తెలుగు చిత్రసీమలో ఇప్పుడున్న ఎంతోమంది హీరోలకి స్ఫూర్తి. చిరు స్టెప్పులు, నటన చూసి సినిమా రంగంపై మక్కువ పెంచుకున్న వారెందరో ఉన్నారు. ఒక్క టాలీవుడ్ లోనే కాదు కోలీవుడ్, శాండిల్ వుడ్ లోను మెగాస్టార్ అంటే అభిమానించే స్టార్స్ ఉన్నారు. తాజాగా ఆ జాబితాలోకి కన్నడ సూపర్ స్టార్ రాజ్ కుమార్ తనయుడు పునీత్ రాజ్ కుమార్ చేరారు. కన్నడలో పవర్ స్టార్ గా పేరు దక్కించుకున్న హీరోకి చిరంజీవి అంటే భలే ఇష్టమంట. అందుకే చిరు కనిపించగానే అతనితో కలిసి ఫోటో తీసుకొని తన ఆనందాన్ని సోషల్ మీడియాలో షేర్ చేసుకున్నారు. “చిరంజీవిగారిని కలవడం ఎప్పుడూ సంతోషంగానే ఉంటుంది. ఆయనెంతో మంచి వ్యక్తి, గొప్ప నటుడు, అద్భుతమైన డ్యాన్సర్. నేను ఆయనకు పెద్ద అభిమానిని” అంటూ అభిమానాన్ని వెల్లడించారు.
ఇక చిరంజీవి విషయానికి వస్తే.. సైరా నరసింహా రెడ్డి సినిమా పనుల్లో బిజీగా ఉన్నారు. తొలి భారతీయ స్వాతంత్ర సమర యోధుడు రేనాటి సూర్యుడు ఉయ్యాలవాడ నరసింహ రెడ్డి జీవితం ఆధారంగా సురేందర్ రెడ్డి తెరకెక్కిస్తున్న ఈమూవీ మొదటి షెడ్యూల్ పూర్త చేసుకొని రెండో షెడ్యూల్ కి ముస్తాబు అవుతోంది. కొణిదెల ప్రొడక్షన్ కంపెనీ బ్యానర్ లో రామ్ చరణ్ నిర్మిస్తున్న ఈ చిత్రంలో అమితాబ్ బచ్చన్, జగపతి బాబు, కిచ్చ సుదీప్, విజయ్ సేతు పతి లు కీలక పాత్రలు పోషిస్తున్నారు. ఖైదీ నంబర్ 150 తర్వాత చిరంజీవి చేస్తున్న ఈ సినిమాపై భారీ అంచనాలున్నాయి.
