అర్జున్‌రెడ్డి అవకాశం వదులుకున్నందుకు బాధగా ఉంది – పార్వతి

సందీప్ రెడ్డి దర్శకత్వంలో తెరకెక్కిన అర్జున్ రెడ్డి సంచలన విజయం సాధించింది. విజయ్ దేవరకొండ హీరోగా నటించిన ఈ మూవీ తెలుగు చిత్ర కథలకు కొత్త దారిని చూపించాయి. బోల్డ్ కథలను సైతం తెలుగు ప్రేక్షకులు ఆదరిస్తారని ఈ సినిమా నిరూపించింది. అయితే ఈ సంగతిని మలయాళ బ్యూటీ పార్వతీ నాయ‌ర్‌ గెస్ చేయలేక పోయింది. ఇందులో హీరోయిన్ గా చేస్తే ఇక అవకాశాలు రావని బయపడింది. కానీ అర్జున్ రెడ్డి లో హీరోయిన్ గా నటించిన షాలిని పాండే కి వచ్చిన ఛాన్స్ లను చూసి ఇప్పుడు బాధపడుతోంది. రీసెంట్ గా ఇచ్చిన ఓ ఇంట‌ర్యూలో ఆ సినిమా గురించి మాట్లాడింది. “అర్జున్‌రెడ్డి` క‌థ ముందు నేనే విన్నాను.

అయితే సినిమాలో చాలా లిప్‌లాక్‌లు ఉంటాయ‌ని తెలిసి భ‌య‌ప‌డ్డా. అందుకే చేయ‌లేక‌పోయా. అందుకు ఇప్పుడు బాధ‌ప‌డుతున్నా. ఆ సినిమా విజయాన్ని, అందులో నటించిన హీరోయిన్‌కు వ‌చ్చిన పాపులారిటీని నేను ఊహించ‌లేక‌పోయాను” అని పార్వ‌తి వివరించింది. ప్రస్తుతం షాలిని పాండే మహానటి చిత్రంలో చిన్న రోల్ చేస్తోంది. అలాగే తమిళంలో, తెలుగులో సినిమాలకు సైన్ చేసింది. ఇవి హిట్ అయితే రెండు పరిశ్రమల్లోను టాప్ హీరోయిన్స్ జాబితాలో చేరిపోతుంది.