Custody: అనుకున్న కథ అనుకున్నట్లుగా తీసి ఉంటే అక్కడైనా హిట్‌ కొట్టేది కదా?

కొన్ని సినిమాలు అనుకున్నవి అనుకున్నట్లుగా తీస్తేనే విజయం దక్కుతుంది. మరికొన్ని సినిమాలకు మార్పులు కలిసొస్తాయి. పూర్తి స్థాయి కథ, స్క్రిప్ట్‌తో సెట్స్‌ మీదకు వస్తే ఇలాంటి ఇబ్బంది ఉండదు. అయితే ఏమైందో ఏమో ఓ సినిమా అంతా ఓకే అనుకున్నాక వివిధ కారణాల వల్ల మార్పులకు గురై, కాస్త కంగాళీ అయ్యి ఫలితం దెబ్బకొట్టేసింది. దీంతో అనుకున్నది అనుకున్నట్లు తీసి ఉన్నా అక్కడ విజయం దక్కేది కదా అనే మాట వినిపిస్తోంది.

Custody

పైన ఉపోద్ఘాతం అంతా నాగచైతన్య ‘కస్టడీ’ (Custody) సినిమా గురించే. అవును వెంకట్‌ ప్రభు తెరకెక్కించిన ఆ సినిమా గురించే ఇదంతా. అక్కినేని అభిమానులు అస్సలు గుర్తుంచుకోకూడదు అని అనుకునే సినిమా ఇది. ఏ సినిమా ఎత్తుకున్నా అందులో వైవిధ్యం, మాస్‌ – యాక్షన్‌ అంశాలను మేళవించే వెంకట్‌ ప్రభు (Venkat Prabhu) నుండి వస్తుండటంతో ‘కస్టడీ’ మీద మంచి అంచనాలే ఏర్పడ్డాయి. కానీ తెరపైకి వచ్చాక సరైన స్పందన రాలేదు.

అయితే ఆ సినిమా అయిన వెంటనే వెంకట్‌ ప్రభు ‘ది గోట్‌’ (The Greatest of All Time )  సినిమా పనుల్లో బిజీ అయిపోయారు. దీంతో ‘కస్డడీ’ గురిచిం పెద్దగా ఎక్కడా చర్చ జరగలేదు. కానీ ఇప్పుడు ఆయన తమిళ మీడియా ఇంటర్వ్యూలో మాట్లాడుతూ కొన్ని ఆసక్తికర కామెంట్స్ చేశారు. అసలు సినిమాకు ముందు అనుకున్న స్టోరీ ఇది కానే కాదు అని బాంబు పేల్చారాయన. వివిధ కారణాల వల్ల మార్చాల్సి వచ్చింది అని చెప్పారు.

వెంకట్ ప్రభు తొలుత కథ రాసుకున్నప్పుడు వెనుకబడిన కులానికి చెందిన ఒక పోలీస్ కానిస్టేబుల్ ఒక పెద్ద క్రిమినల్‌ని పట్టుకోవడం సినిమా ప్రారంభమవుతుందట. అయితే ఇద్దరిదీ ఒకే కులం కావడంతో అతనిని వదిలేయాలనే ఒత్తిడి సంఘం నుండి ఒత్తిడి వస్తుందట. కానీ ఆ పోలీసు.. డ్యూటీకి కట్టుబడి నేరస్థుడిని కోర్టు ముందుకు ఎలా తీసుకొచ్చాడు అనేదే కథ. ఈ మధ్యలో ఏం జరిగింది అనేదే సినిమానట.

అయితే ఈ తరహా కథ వల్ల తెలుగులో ఇబ్బందులు వస్తాయని ముఖ్యమంత్రి, మాఫియా, హత్యలు అంటూ ఏవేవో కలిపేసి సినిమా తీశారు. మామూలుగా అయితే ఇలాంటి సినిమాలు తమిళంలో బాగానే ఆడేవి. కనీసం అలా తీసి ఉన్నా ‘కస్టడీ’ తమిళంలో విజయం సాధించేది అనే అభిప్రాయం వ్యక్తమవుతోంది.