ప్రియురాలి విషయమై స్పందించిన విజయ్

వరుసగా మూడు హిట్స్ అందుకోవడంతో విజయ్ దేవరకొండ ఎనలేని క్రేజ్ సొంతం చేసుకున్నారు. అతను తాజాగా నటించిన చిత్రం నోటా. ఆనంద్ శంకర్ దర్శకత్వంలో ఏకకాలంలో తెలుగు, తమిళ భాషల్లో తెరకెక్కిన ఈ మూవీ ఈరోజు రిలీజ్ అయి మిశ్రమ స్పందన అందుకుంది. ఈ సందర్భంగా మీడియా ముందుకు వచ్చిన విజయ్ అనేక అంశాలపై మాట్లాడారు. ఎవడే సుబ్రమణ్యం సినిమా తర్వాత నటనను మానేసి దర్శకత్వం వైపు వెళ్లాలని అనుకున్నాననీ ఆనాటి రోజులను గుర్తుచేసుకున్నారు. వరుసవిజయాలు రావడంతో ఆనందంగా ఉన్నట్లు పేర్కొన్నారు. తన పేరును ఇంగ్లిష్‌లో అనువదించి ‘కింగ్‌ ఆఫ్‌ ది హిల్‌’ అని సొంత ప్రొడక్షన్ సంస్థకు పేరు పెట్టినట్లు విజయ్ దేవరకొండ తెలిపారు. ఎవరైనా మంచి స్క్రిప్టుని తీసుకొస్తే వాళ్లని ప్రోత్సహించాలనే ఉద్దేశంతోనే ఈ సంస్థ పెట్టినట్లు వెల్లడించారు.

తనకు కథపైనా, వ్యక్తులపైనా నమ్మకం కుదిరితేనే సినిమాను చేస్తానని స్పష్టం చేశారు. కొన్ని రోజులుగా విజయ్ ఓ యువతితో కలిసి ఉన్న ఫోటోలు సోషల్ మీడియాలో తెగ చక్కర్లు కొట్టాయి. వాటిపైన ప్రశ్నించగా నవ్వుతూ బదులిచ్చారు. “ఆ ఫొటోలో ఉన్న అమ్మాయి చాలా మంచిది. ఇక మిగిలిన విషయాలను మరిచిపోవాలి” అని వెల్లడించారు. బెల్జియం దేశానికి మిలానే.. విజయ్ కుటుంబ సభ్యులతో కలిసి డిన్నర్ చేయడం చూస్తుంటే.. పవన్ కళ్యాణ్ మాదిరి విజయ్ దేవరకొండ కూడా విదేశీ అమ్మాయినే పెళ్లిచేసుకునేటట్టు ఉన్నారని ఫిలిం నగర్ వాసులు చెప్పుకుంటున్నారు.