Nayanatara: కాంట్రవర్సియల్‌ సినిమా ట్రైలర్‌ తీసుకొస్తారట… ఈసారి ఏమవుతుందో?

ఇటీవల కాలంలో తమిళనాటు తెరకెక్కుతున్న కొన్ని సినిమాలు ఏదో విధంగా వివాదంలో చిక్కుకుంటున్నాయి. అయితే అలాంటి సినిమాలకు నయనతారకు (Nayanthara) కచ్చితంగా కనెక్టివిటీ ఉంటోంది. ఈ మాట వింతే విచిత్రంగా అనిపించొచ్చు కానీ.. ఇది నిజం. ఎందుకంటే ‘అన్నపూరణి: ది గాడెస్‌ ఆఫ్‌ ఫుడ్‌’ (Annapoorani: The Goddess of Food) సినిమా ఎంతటి రచ్చ చేసిందో మీకు తెలిసిందే. ఆ సినిమాలో నయన్‌ పాత్ర, ఆ క్యారెక్టర్‌ను చూపించిన తీరు విషయంలో చాలా విమర్శలు వచ్చాయి. ఇప్పుడు మరో సినిమాకు అలాంటి సమస్యే వచ్చింది.

అయితే, ఆ సినిమా మీద వచ్చి వివాదం కొత్తది కాదు. అలాగే ఆ సినిమాలో ఆమె నటిస్తోందా లేదా అనే విషయంలో కూడా క్లారిటీ లేదు. తమిళంలో ప్రస్తుతం దర్శకుడు విఘ్నేశ్‌ శివన్‌ (Vignesh Shivan) దర్శకత్వంలో ‘ఎల్‌ఐసీ’ (లవ్‌ ఇన్సూరెన్స్‌ కార్పొరేషన్‌) అనే సినిమా తెరకెక్కుతోంది. ఆ సినిమాలో ‘లవ్‌ టుడే’ (Love Today) ఫేమ్‌ నటుడు, దర్శకుడు ప్రదీప్‌ రంగనాథన్‌ (Pradeep Ranganathan) హీరో. ఈ సినిమాలో కథానాయికగా కృతి శెట్టి (Krithi Shetty) నటిస్తోందనే విషయం తెలిసిందే. ఈ సినిమా టీజర్‌ను ఈ నెల 14న విడుదల చేస్తారట.

ఇటీవలే సింగపూర్‌లో ఓ షెడ్యూల్‌ పూర్తి చేసుకుంది సినిమా టీమ్‌. ఏప్రిల్‌ 14న తమిళ కొత్త సంవత్సరం కాబట్టి… ఆ రోజు సినిమా టీజర్‌ను విడుదల చేసేందుకు చిత్రబృందం ఆలోచిస్తోందని టాక్‌. ఈ నేపథ్యంలో రెండు విషయాల్లో క్లారిటీ రావొచ్చు అంటూ ఓ వార్త బయటికొచ్చింది. ఒకటి ఈ సినిమా ప్రదీప్‌కి సోదరిగా నయనతారని ఎంపిక చేసినట్లు అప్పట్లో వార్తలు వచ్చాయి. ఆ విషయంలో ఇప్పటి వరకూ అధికారిక ప్రకటన లేదు. ఇక సినిమా టైటిల్‌.

ఈ సినిమాకు ‘ఎల్‌ఐసీ’ అనే టైటిల్‌ పెట్టడం విషయంలో ఇన్సూరెన్స్ సంస్థ ఎల్‌ఐసీ ఇప్పటికే ఆగ్రహం వ్యక్తం చేసి న్యాయపరమైన చర్యలకు దిగింది. దీంతో ఈ టైటిల్‌ పెడతారా? నయన్‌ ఉంటుందా అనే రెండు డౌట్స్‌ ఆ రోజు క్లియర్‌ అవుతాయి అంటున్నారు. విఘ్నేశ్‌ శివన్‌ సినిమా కాబట్టి నయన్‌ నటించడం పెద్ద కష్టం కాదు అని అంటున్నారు.