హరికృష్ణ కోరిక తీరుంటే బాగుండేది

తెలుగు దేశం పార్టీ రథ సారధి, నటుడు నందమూరి హరికృష్ణ నిన్న రోడ్డు ప్రమాదంలో ప్రాణాలను విడిచారు. అతని మరణం నందమూరి ఫ్యామిలీతో పాటు అభిమానులను కన్నీటిలో ముంచివేసింది. కళ్యాణ్ రామ్, ఎన్టీఆర్ లు తండ్రి లేరనే నిజాన్ని జీర్ణించుకోలేకపోతున్నారు. వీరు ముగ్గురు ఒకే సినిమాలో నటిస్తే చూడాలని అభిమానులు ఎప్పటి నుంచో కోరుకుంటున్నారు. హరికృష్ణకి కూడా ఆ కోరిక బలంగా ఉండేది. ఆ విషయాన్ని పలుమార్లు సన్నిహితులకు చెప్పుకునేవారంట. ఆరోగ్య కారణాల వల్ల కొన్ని రోజులుగా రాజకీయ విషయాలకు దూరంగా ఉన్నారు.

ఆరోగ్యం కుదుట పడగానే పూర్తి ఉత్సాహంతో సినిమాలో నటించాలని ఆశపడ్డారు. తండ్రి కోసం మంచి కథ సిద్ధం చేయమని కళ్యాణ్ రామ్ కూడా ప్రముఖ రచయితలకు చెప్పారు. తమ్ముడు, తండ్రి కోసం మంచి కథ రాయాలని.. ఆ చిత్రాన్ని తాను నిర్మించాలనుకున్నప్పటికీ.. అందులో తనకి కూడా మంచి రోల్ ఉండాలని కళ్యాణ్ రామ్ రచయితలను కోరినట్టు ఫిలిం నగర్ వాసులు చెప్పుకుంటున్నారు. ఆ కథని సిద్ధం చేసే పనిలోనే ఉండగా ఇలా ప్రమాదం జరిగిందని ఆవేదన వ్యక్తం చేస్తున్నారు. హరికృష్ణ కోరిక తీరుంటే బాగుండేదని హరికృష్ణ సన్నిహితులు బాధపడుతున్నారు.