హీరోగా ఎన్నో సినిమాలు చేసి కుటుంబ ప్రేక్షకులకు దగ్గరయిన జగపతిబాబు ‘లెజెండ్’ సినిమాతో విలన్ గా మారిన సంగతి తెలిసిందే. తర్వాత విలన్, సహాయక పాత్రలు చేస్తూ మునుపటి కంటే కూడా బిజీ అయిపోయారు. తెలుగుతోపాటు తమిళ, మలయాళ భాషల్లో ఇప్పుడు ఆయన నటిస్తున్నారంటే అప్పుడు తీసుకున్న నిర్ణయమే కారణం. అయితే జగపతి మళ్ళీ హీరోగా మారనున్నారట.’జాగ్వార్’ సినిమాతో తన తనయుడు నిఖిల్ ను హీరోని చేస్తోన్నారు మాజీ ప్రధాని దేవెగౌడ తనయుడు కర్ణాటక ముఖ్యమంత్రి కుమారస్వామి. తండ్రి రాజకీయాల్లో ఉన్నా కుమారస్వామికి సినిమాలంటే మక్కువ ఎక్కువ.
ఆ ఇష్టంతోనే పలు సినిమాలకు నిర్మాతగా, పంపిణీదారునిగా ఉన్న కుమారస్వామి ఇప్పుడు తెలుగులో అగ్ర హీరో, దర్శకులతో సినిమాలు చేసేందుకు ప్రయత్నాలు చేస్తున్నారు. ఇప్పటికే పవన్ కళ్యాణ్, త్రివిక్రమ్, కొరటాల శివ, పూరి జగన్నాధ్ తదితరులతో చర్చలు జరిపిన కుమారస్వామి జగపతి బాబు హీరోగా ఓ సినిమాని నిర్మించనున్నారట. ఇప్పటికే కథా చర్చలు పూర్తైన ఈ సినిమా ప్రస్తుతం పూర్వ నిర్మాణ దశలో ఉందట. జగపతి బాబు ‘జాగ్వార్’ లోనూ విలన్ గా నటించారు. ఆ అనుబంధంతోనే ఈ సినిమా చేస్తున్నారట. జగపతి హీరో అంటే… మళ్ళీ హీరోయిన్స్ తో రొమాన్స్ చేస్తారా లేక ఏదైనా భిన్నమైన కథ ఎంచుకుంటారా అన్నది తెలియాల్సిఉంది.
