వైయస్సార్ బయోపిక్ లో కీలకపాత్రలో జగపతిబాబు

హీరోగా వరుస ఫ్లాపులతో కొట్టుమిట్టాడుతూ.. ఆఫర్ల కోసం ఎదురుచూస్తున్నప్పుడు కనీసం జగపతిబాబు పేరు సైతం తలుచుకోని దర్శకులకు ఇప్పుడు స్టైలిష్ విలన్ అంటే వెంటనే గుర్తొచ్చే పేరు జగపతిబాబు. “లెజండ్”లో నెగిటివ్ రోల్ లో జగపతిబాబు చూపించిన నట విశ్వరూపం అలాంటిది. అందుకే అప్పటివరకూ స్టైలిష్ విలన్ కావాలంటే పరాయి భాషా నటులవైపు చూస్తూ వచ్చిన తెలుగు దర్శకులకు దొరికిన అడ్రెస్ జగపతిబాబు. అందుకే ఆయన విలన్ గా సెకండ్ ఇన్నింగ్స్ స్టార్ట్ చేసినప్పట్నుంచి అగ్ర దర్శకులందరూ ఆయన కోసమే లేదా ఆయన్ను దృష్టిలో పెట్టుకొని క్యారెక్టర్స్ క్రియేట్ చేయడం మొదలుపెట్టారు.

ఈమధ్యకాలంలో విలన్ పాత్రలు మాత్రమే కాకుండా మంచి క్యారెక్టర్ రోల్స్ కూడా జగపతిబాబును వెతుక్కుంటూ వస్తున్నాయి. “హలో” సినిమాలో అఖిల్ తండ్రిగా జగపతిబాబు నటనకు విశేషమైన ప్రశంసలు దక్కిన విషయం తెలిసిందే. ఇప్పుడు మరోమారు తండ్రి పాత్రలో కనిపించనున్నారు జగపతిబాబు. ఈసారి మాంచి పవర్ ఫుల్ ఫాదర్ అన్నమాట. కడప కింగ్ అని పేర్కొనే రాజారెడ్డి, ఫాదర్ ఆఫ్ రాజశేఖర్ రెడ్డిగా జగపతిబాబు కనిపించనున్నారు. మహి.వి.రాఘవ్ దర్శకత్వంలో తెరకెక్కుతున్న “యాత్ర” సినిమాలో ఆయన ఈ పాత్ర పోషించనున్నారు. మలయాళ మెగాస్టార్ మమ్ముట్టి దివంగత నేత రాజశేఖర్ రెడ్డిగా ముఖ్యపాత్ర పోషిస్తున్న ఈ చిత్రం రెగ్యులర్ షూటింగ్ ఇటీవల మొదలైన విషయం తెలిసిందే. త్వరలోనే జగపతిబాబు షూటింగ్ లో పాల్గొంటారు.