Jetlee Review In Telugu: జెట్ లీ సినిమా రివ్యూ & రేటింగ్!

క‌మెడియ‌న్లు హీరోలుగా మార‌డం టాలీవుడ్‌లో కొత్తేమీ కాదు. బ్ర‌హ్మానందం, సునీల్ నుంచి చాలా మంది హాస్య‌న‌టులు హీరోలుగా సినిమాలు చేశారు. జెట్‌లీ (Jetlee) మూవీతో వారి బాట‌లోనే టాలీవుడ్ స్టార్ క‌మెడియ‌న్ స‌త్య అడుగులు వేశారు. మ‌త్తు వ‌ద‌ల‌రా ఫేమ్ రితేష్ రానా ద‌ర్శ‌క‌త్వంలో కామెడీ థ్రిల్ల‌ర్‌గా తెర‌కెక్కిన ఈ సినిమాను మైత్రీ మూవీ మేక‌ర్స్ స‌మ‌ర్ప‌ణ‌లో చెర్రీ, హేమ‌ల‌త నిర్మించారు. శుక్ర‌వారం ప్రేక్ష‌కుల ముందుకొచ్చిన ఈ సినిమా ఎలా ఉంది? హీరోగా స‌త్య తెలుగు ప్రేక్ష‌కుల‌ను న‌వ్వించాడా ? లేదా? అంటే?

Jetlee Movie Review

కథ: ప్ర‌జాప‌తి బ్యాంకు దివాళా తీస్తుంది. బాధితులు రోడ్డున ప‌డ‌తారు. ఈ న‌ష్టాల‌కు కార‌ణం హ‌రీష్ చంద్ర (శుభ‌లేఖ సుధాక‌ర్‌) అనే వ్య‌క్తి అని త‌ప్పుడు ఆధారాలు సృష్టించి బ్యాంకు ఓన‌ర్ ప్ర‌జాప‌తి (అజ‌య్‌) దుబాయ్ పారిపోతాడు. ప్ర‌జాప‌తి ఆచూకీ క‌నిపెట్టాల‌ని హోమ్ మంత్రి మేల్కొటే ఆర్డ‌ర్స్ వేస్తాడు. ఈ సీక్రెట్ ఆప‌రేష‌న్‌ను ఏజెంట్ శివానీ రాయ్ (రియా సింఘా) చేప‌డుతుంది. ప్ర‌జాప‌తి ప‌ట్టుకొని దుబాయ్ నుంచి కొచ్చికి వ‌చ్చే ఫ్లైట్‌లో ఇండియా తీసుకురావాల‌ని అనుకుంటుంది. అదే ఫ్లైట్‌లో ప్ర‌జాప‌తిని చంపాల‌ని కొంద‌రు ప్ర‌య‌త్నిస్తుంటారు. డాక్ట‌ర్ వేద‌వ్యాస్ (స‌త్య‌) కార‌ణంగా వారి ప్లాన్స్ ఫెయిల‌వుతాయి. అస‌లు వేద‌వ్యాస్ ఎవ‌రు? ప్ర‌జాప‌తి మ‌నిషిగా ఆ ఫ్లైట్ ఎక్కిన వేద‌వ్యాస్ అత‌డికే ఎందుకు ఎదురుతిర‌గాడు? జాన్ సెనా, స‌త్య అక్క‌ల అంటూ ర‌క‌ర‌కాల మారుపేర్లు ఎందుకు చెప్పాడు? ప్ర‌జాప‌తిపై ప‌గ‌తో ఆ ఫ్లైట్‌లోకి ఎక్కిన హ‌రీష్ చంద్ర కొడుకు ఎవ‌రు? వేద‌వ్యాస్ ప్లాన్ ఏమిటి? అన్న‌దే ఈ మూవీ క‌థ‌.

నటీనటుల పనితీరు: జెట్‌లీ సినిమాకు స‌త్య వ‌న్ మెన్ షోగా నిలిచాడు. సినిమా ఫ‌స్ట్ సీన్ నుంచి లాస్ట్ వ‌ర‌కు ప్ర‌తి ఫ్రేమ్‌లో క‌న‌బ‌డ్డాడు. త‌న డైలాగ్ డెలివ‌రీ, మ్యాన‌రిజ‌మ్స్‌తో కొన్ని చోట్ల న‌వ్వించాడు. సినిమా ఫ‌జిల్స్‌ నింపే వ్య‌క్తిగా వెన్నెల‌కిషోర్ పంచ్‌లు కొన్ని పేలాయి. యాక్ష‌న్ రోల్‌లో రియా సింఘా ఒకే అనిపించింది. అజ‌య్‌, క‌బీర్ సింగ్ దుహాన్‌ల‌కు ఇలాంటి పాత్ర‌లు కొత్త కాదు. గెట‌ప్ శ్రీను, గుండు సుద‌ర్శ‌నం, శ్రీనివాస‌రెడ్డి, హ‌ర్ష చెముడు…ఇలా చాలా మందే సినిమాలో క‌మెడియ‌న్లు ఉన్నా ఎవ‌రూ న‌వ్వించ‌లేక‌పోయారు.

సాంకేతికవర్గం పనితీరు: టెక్నిక‌ల్‌గా కాల‌భైర‌వ మ్యూజిక్ ఈ సినిమాకు ప్ల‌స్ పాయింట్‌గా నిలిచింది. కామెడీ థ్రిల్ల‌ర్ మూవీకి త‌గ్గ‌ట్లుగా బీజీఎమ్ అందించాడు. రితేష్ రానా ద‌ర్శ‌కుడిగానే కాకుండా రైట‌ర్‌గా ఫెయిల‌య్యాడు. తాను రాసుకున్న కాన్సెప్ట్‌ను పూర్తిగా థ్రిల్ల‌ర్ సినిమాగా తెర‌కెక్కించాలా? కామెడీ మూవీగా చేయాలా అనే క‌న్ఫ్యూజ‌న్ అత‌డిలో బాగా క‌నిపించింది. . చిన్న సినిమానే అయినా ప్రొడ‌క్ష‌న్ వాల్యూస్ రిచ్‌గా ఉన్నాయి. చెర్రీ, హేమ‌ల‌త బ‌డ్జెట్ విష‌యంలోఎక్క‌డ రాజీప‌డ‌లేదు. ఎడిట‌ర్ కార్తీక శ్రీనివాస్ క‌త్తెర‌కు ప‌నిచెప్పాల్సిన సీన్లు చాలానే ఉన్నాయి. సురేష్ సారంగం సినిమాటోగ్ర‌ఫీ బాగుంది.

విశ్లేషణ: క్విర్కీ కామెడీ కాన్సెప్ట్‌తో తెలుగులో వ‌చ్చిన‌ జాతిర‌త్నాలు, మ్యాడ్‌, మ‌త్తు వ‌ద‌ల‌రాతో పాటు ప‌లు సినిమాలు ప్రేక్ష‌కుల‌ను మెప్పించాయి. ఈ క‌థ‌ల్లో లాజిక‌ల్‌ల‌తో ప‌ని ఉండ‌దు. గ‌మ్మ‌త్తైన పాత్ర‌లు, వాటి తాలూకు మ్యాన‌రిజ‌మ్స్‌, ఆ క్యారెక్ట‌ర్లు చేసే అల్ల‌రి, హ‌డావిడి వినోదాన్ని పంచుతాయి.

జెట్ లీ అలాంటి సినిమానే. బ్యాంకు స్కామ్‌లు అనే సెన్సిటివ్‌ పాయింట్‌కు కామెడీని జోడించి ద‌ర్శ‌కుడు రితేష్ రానా ఈ క‌థ‌ను రాసుకున్నారు. సినిమా మొత్తం ఫ్లైట్‌లోనే సాగుతుంది. అందులోనూ స్టార్ క‌మెడియ‌న్ స‌త్య హీరో అన‌గానే జెట్‌లీ పై అంచ‌నాలు ఏర్ప‌డ్డాయి. కానీ ఆడియెన్స్‌కు ఎక్స్‌పెక్టేష‌న్స్‌కు మాత్రం సినిమా రీచ్ కాలేక‌పోయింది.

దుబాయ్ నుంచి ఇండియాకు వ‌చ్చే ఫ్లైట్ జ‌ర్నీలో నాలుగు గంట‌ల్లో జ‌రిగిన సంఘ‌ట‌న‌ల స‌మాహార‌మే ఈ క‌థ . చిన్న పాయింట్‌ను తీసుకొని స్ఫూఫ్‌లు, పంచ్‌ల‌తో రెండు గంట‌లు న‌వ్వించ‌డానికి డైరెక్ట‌ర్ చాలా క‌ష్ట‌ప‌డ్డారు.

ప్ర‌జాప‌తి పాత్ర‌ను ప‌రిచ‌యం చేస్తూనే ఈ సినిమా మొద‌ల‌వుతుంది. ఫ్లైట్‌లో త‌న గతం మ‌ర్చిపోయి బ్లైండ్ డాక్ట‌ర్‌గా ఆరంభంలో స‌త్య చేసే కామెడీ కాస్తంత ప‌ర్వాలేద‌నిపిస్తుంది. ఆ త‌ర్వాత ఒక్కో పాత్ర‌ను ప‌రిచ‌యం చేస్తూ ఓ వైపు కామెడీ, మ‌రోవైపు స‌స్పెన్స్ క్రియేట్ చేయాల‌ని అనుకున్నారు డైరెక్ట‌ర్‌. ఈ క్ర‌మంలో తాను క‌న్ఫ్యూజ్ అయ్యి ఆడియెన్స్‌ను క‌న్ఫ్యూజ్ చేశాడు. మ‌ల్టీ ప‌ర్స‌నాలిటీ డిజార్డ‌ర్ టైప్‌లో స‌త్య పాత్ర చిత్ర విచిత్రంగా ప్ర‌వ‌ర్తిస్తుంది. ఓ సారి సీక్రెట్ ఏజెంట్‌, మ‌రోసారి విల‌న్ గ్యాంగ్ మెంబ‌ర్ అత‌డు చేసే హ‌డావిడి, హిందీలో సంబంధం లేకుండా చెప్పే డైలాగ్స్ న‌వ్వించ‌లేక‌పోగా చిరాకును తెప్పించాయి.

పోనీ సెకండాఫ్‌లోనైనా ద‌ర్శ‌కుడు ట్రాక్‌లా ప‌డ్డాడా అంటే అదీ లేదు. హైజాక్‌, బాంబు డ్రామా అంటూ సిల్లీగా క్లైమాక్స్ వ‌ర‌కు సాగ‌దీశారు. సీన్‌కు సంబంధం లేకుండా నాన్ సింక్‌లో డైలాగ్స్ చెబుతూ పాత్ర‌ల‌న్నీ ఇరిటేట్ చేస్తాయి. ఓ టైమ్‌లో అస‌లు స్క్రీన్‌పై ఏం జ‌రుగుతుందో కూడా అంతు ప‌ట్ట‌దు.

పోలీస్ స్టోరీ, నాన్న‌కు ప్రేమ‌తో పాటు చాలా సినిమాల స్ఫూఫ్‌లు ఈ సినిమాలో క‌నిపిస్తాయి. దేవ‌ర క‌థ తెలియాలి… మైండ్‌లో ఫిక్స‌యితే బ్లైండ్‌గా వెళ్లిపోతా లాంటి డైలాగ్స్‌ను కామెడీ కోసం వాడాడు. స‌త్య త‌న‌పై తానే సెటైర్లు వేసుకున్నారు. అజ‌య్‌, వెన్నెల‌కిషోర్ యాక్టింగ్‌పై పంచ్‌లు వేశారు. ఏవి సినిమాను కాపాడ‌లేదు. బాల‌కృష్ణ స్టైల్‌లో పైలెట్ చెప్పే డైలాగ్స్ కొంత వ‌ర‌కు న‌వ్వించాయి. న్యాయం కావాలి, చంట‌బ్బాయితో పాటు చిరంజీవి రిఫ‌రెన్స్‌ల‌ను చాలానే వాడారు. క్లైమాక్స్‌లో వెన్నెల కిషోర్ పాత్ర విష‌యంలో వ‌చ్చే ట్విస్ట్ ఒక‌టి ప‌ర్వాలేద‌నిపిస్తుంది.

ఫోకస్ పాయింట్: జెట్ లీ నో లాజిక్స్‌.. నో కామెడీ.. ఓన్లీ ప్ర‌స్టేష‌న్‌..

రేటింగ్: 2/5