K. Viswanath: కె.విశ్వనాథ్‌ గురించి చిరంజీవి చెప్పిన ఆసక్తికర విషయాలు!

June 7, 2022 / 09:52 AM ISTByFilmy Focus

Join Us

K. Viswanath: కె.విశ్వనాథ్‌ గురించి చిరంజీవి చెప్పిన ఆసక్తికర విషయాలు!

కళాతపస్వి కె.విశ్వనాథ్‌ను కళాకారులంతా గురువుగా చూస్తారు. కారణం ఆయన తన నటుల్ని మలిచే విధానం అలాంటిది. తన సినిమాలో నటించిన తర్వాత ఆ నటుడు ఇక తాను మంచి నటుడిని అని రూఢీ చేసుకుంటూ ఉంటారు. ఆయన తన నటుల్ని ఎలా చూస్తారు, సినిమాకు అవసరమైనట్లు ఆ నటుడు ఎలా ఉండాలి అన్నీ క్షుణ్నంగా చూసుకుంటూ ఉంటారు. అయితే ఆయన ఇద్దరు ప్రముఖ నటులకు ఆయన చేసి సూచనల గురించి ఇటీవల బయటకు వచ్చాయి.

‘సైమా’ వేడుక కొన్ని నెలల క్రితం జరిగింది. దానికి సంబంధించిన వీడియో ఒకటి వైరల్‌గా మారింది. అందులో చిరంజీవి, రాధిక చెప్పిన విషయాలు ఉన్నాయి. కె.విశ్వనాథ్‌ తన హీరోలను ఎలా చూసుకుంటారు అనేది చెప్పారు. ‘స్వాతిముత్యం’ షూటింగ్‌ రాజమండ్రిలో ప్రారంభమైన తొలి రోజుల్లో ఓ షాట్‌ అయ్యాక కమల్‌ను విశ్వనాథ్‌ పిలిచారట. ఇదేం బాలేదు, నువ్వు చాలా సన్నగా ఉన్నావ్‌ అని చెప్పారట. ఏం చేద్దాం అని కమల్‌ అనుకుంటుండగా… ఓ స్వీట్‌ప్యాకెట్‌ తెప్పించి ఇచ్చారట.

అందులో స్వీట్స్‌ తినమన్నారట విశ్వనాథ్‌. ఒకటి తీసుకొని కమల్‌ వదిలేస్తే.. మొత్తం నీకే తినేసేయ్‌ అని చెప్పారట. అలా స్వీట్స్‌ తిని కమల్‌ కాస్త లావయ్యాక ఆ సినిమాలోని కీలక సన్నివేశాలు చిత్రీకరించారట కె.విశ్వనాథ్‌. ఈ విషయాన్ని రాధిక చెబుతుండగా, పక్కనే ఉన్న చిరంజీవి మైక్‌ అందుకుని ‘స్వయంకృషి’ సమయంలో జరిగిన ఓ విషయాన్ని చెప్పుకొచ్చారు. ఆ సినిమా టైమ్‌లో చిరంజీవి లావుగా ఉన్నారట. కాస్త సన్నబడదామని మధ్యాహ్న భోజనం ఆపేశారట.

ఓ రోజు సీన్‌ అయిపోయి, లంచ్‌ గ్యాప్‌లో చిన్న కునుకేశారట. ఆ సమయంలో భోజనం దగ్గర కూర్చుని ‘ఏంటి చిరంజీవి రాడా?’ అని అడిగారట విశ్వనాథ్‌. దానికి ఆయన టీమ్‌ ‘లేదండీ ఆయన భోజనం చేయడం లేదు’ అని చెప్పారట. దానికి విశ్వనాథ్‌… ‘ఆకలితో ఉంటాడా, ఖాళీ కడుపుతో ఉన్నవాడితో ఎలా పని చేయించుకుంటాం. తినమని చెప్పండి అన్నారట. దానికి చిరంజీవి టీమ్‌ లేదండి ఆయనకు అలవాటే అని చెప్పారట.

దీంతో విశ్వనాథ్‌ స్వయంగా పెరుగన్నం కలిపి చిరంజీవి బెడ్‌ దగ్గర పెట్టారట. లేచి చూస్తే పెరుగున్నం అక్కడ ఉందట. టీమ్‌ అసలు విషయం చెప్పేసరికి.. చిరంజీవి ఆ పెరుగన్నాన్ని ప్రసాదంగా భావించి తిన్నారట. విశ్వనాథ్‌కు ఆయన ఇచ్చే గౌరవం అలాంటిది. సూపర్‌ కదా.