చిక్కుల్లో ‘కబాలి’

సూపర్ స్టార్ రజనీకాంత్ నటిస్తున్న చిత్రం ‘కబాలి’. ఇటీవలే ఈ చిత్రానికి సంబంధించిన టీజర్ ను విడుదల చేయగా.. కేవలం మూడు రోజుల్లోనే ఈ టీజర్ కోటి వ్యూస్ ను సాధించింది. అంతేకాకుండా కేవలం 24 గంటల్లోనే భారతదేశపు యూట్యూబ్ రికార్డులన్నీ ఈ టీజర్ తుడిచిపెట్టింది. పా రంజిత్ దర్శకత్వంలో తెరకెక్కుతున్న ఈ చిత్రం మే నెలాఖరులో కానీ, జూన్ మొదటి వారంలో కానీ ప్రేక్షకుల ముందుకు రానుంది. ఈ చిత్రం తెలుగులోను విడుదల అవుతుండగా.. తెలుగు వర్షన్ కు సంబంధించి ఈ చిత్రాన్ని కొత్త చిక్కులు వచ్చిపడ్డాయి.

గతంలో రజనీకాంత్ నటించిన ‘విక్రమసింహ’ చిత్రంతో నష్టపోగా.. సుమారు రూ.7 కోట్లను తిరిగి పొందేందుకు తెలుగు డిస్ట్రిబ్యూటర్లు హామీ పొందారు. అయితే ఆ డబ్బులు వారు పొందలేదు. దాంతో వారు ఇప్పుడు కబాలి చిత్రాన్ని అడ్డుకునేందుకు ప్రయత్నాలు సాగిస్తున్నట్లు సమాచారం. మరోవైపు రజినీకాంత్ ఈ విషయంలో జోక్యం చేసుకోవాలని, లేకపోతే రజనీకి వ్యతిరేకంగా పిటిషన్ కూడా దాఖలు చేసే యోచనలో వారు ఉన్నారట. కాగా కబాలి చిత్రానికి సంబంధించి తెలుగు వర్షన్ హక్కులు ఇంకా ఎవరూ దక్కించుకోలేదని కోలీవుడ్ వర్గాల సమాచారం. ఈ చిత్రాన్ని కలైపులి ఎస్ థాను నిర్మిస్తున్నాడు.