సరైన హిట్ పడక, ఒక మంచి హిట్ పడినా ఆ సక్సెస్ ను తదుపరి సినిమాతో కొనసాగించలేక నందమూరి కళ్యాణ్ రామ్ ఇంకా అండర్ రేటెడ్ హీరోగానే ఉండిపోయాడు కానీ.. బేసిగ్గా అతడు మంచి నటుడే. కెరీర్ కొత్తలో మిగతా స్టార్ హీరోల్లా నట ప్రతిభతో మెప్పించలేకపోయాడు కానీ.. “అతనొక్కడే, పటాస్” చిత్రాలతో కథానాయకుడిగా తనకంటూ ప్రత్యేకమైన పంధా ఏర్పరుచుకున్నాడు. మొన్నమధ్య తన దేహాకృతి సైతం మార్చుకొని “ఇజం” అనే చిత్రంలో నటించినప్పటికీ అది సరైన విజయాన్నివ్వలేకపోయింది.
అయితే.. కళ్యాణ్ రామ్ తాజా చిత్రం “నా నువ్వే” మాత్రం మంచి హిట్ అయ్యే సూచనలు కనిపిస్తున్నాయి. “180” ఫేమ్ జయేంద్ర దర్శకత్వంలో తెరకెక్కుతున్న ఈ చిత్రంలో కళ్యాణ్ రామ్ సరసన తమన్నా కథానాయికగా నటిస్తుండగా పి.సి.శ్రీరామ్ కెమెరామెన్ గా వర్క్ చేస్తుండడం విశేషం. ఇవాళ “నా నువ్వే’ టీజర్ విడుదలైంది. కళ్యాణ్ రామ్ న్యూ లుక్, పి.సి.శ్రీరామ్ సినిమాటోగ్రఫీ ప్రత్యేక ఆకర్షణలుగా నిలిచాయి.
