‘శభాష్ నాయుడు’ చిత్రం టైటిల్ మార్చేది లేదు – కమలహాసన్

విశ్వనటుడు కమల్ హాసన్ కి విజయాలు, వివాదాలు రెండు కళ్లు వంటివి. విజయం వచ్చిందని ఆనందించేలోపు.. వివాదం అతన్ని వెక్కిరిస్తూనే ఉంటుంది. తన నటనతో కోట్లాదిమంది హృదయాల్లో స్థానం సంపాదించుకున్న కమల్ తన సినిమా రిలీజ్ విషయంలో అనేక సార్లు వివాదాలతో పోరాడారు. రీసెంట్ గా అతను హోస్ట్ గా చేస్తున్న తమిళం బిగ్ బాస్ సీజన్ 2 షోని నిలిపివేయాలని టెక్నీషియన్స్ గొడవచేసారు. దానిని దగ్గరుండి పరిష్కరించిన కమల్ మెడకి మరో వివాదం చుట్టుకుంది. కమల్ సొంతంగా కథ రాసుకొని, దర్శకత్వం వహిస్తున్న సినిమా “శభాష్ నాయుడు”. అంతేకాదు హీరో, నిర్మాత కూడా కమల హాసనే. బ్రహ్మనందం, శృతిహాసన్, రమ్యకృష్ణ తదితరులు కీలకపాత్రలు పోషిస్తున్న ఈ మూవీ 50 శాతం షూటింగ్ పూర్తి చేసుకుంది.

త్వరలోనే ఈ చిత్రాన్ని కంప్లీట్ చేయాలనీ కమల్ భావిస్తున్నారు. అయితే ఈ సినిమా పేరులోని “నాయుడు” పదం తమ సామాజిక వర్గం మనోభావాలను దెబ్బ తీసేలా ఉందని, వెంటనే దానిని మార్చాలని కొందరు డిమాండ్ చేస్తున్నారు. టైటిల్ మార్చకుండా విడుదల చేస్తే అడ్డుకుంటామని బెదిరిస్తున్నారని సమాచారం. అయితే, వారి బెదిరింపులను కమల్ పట్టించుకోవడం లేదు. “ఏమి చేసుకుంటారో చేస్కోండి.. సినిమా టైటిల్ మార్చే ప్రసక్తే లేదు” కమల్ తనని బెదిరిస్తున్నవారికి చెప్పారని కోలీవుడ్ మీడియా నేడు కథనాలను ప్రచురించింది. మరి ఈ వివాదం ఎంతవరకు వెళుతుందోనని కమల్ ఫ్యాన్స్ ఆందోళన పడుతున్నారు. కమల్ హాసన్ సొంతపార్టీ పెట్టినప్పటి నుంచి అతనిపై విమర్శలు ఎక్కువయ్యాయని అభిమానులు భావిస్తున్నారు.