పిజ్జా, జిగర్‌తండ, ఇరైవి చిత్రాలతో మంచి దర్శకుడిగా పేరు తెచ్చుకున్న కార్తీక్ సుబ్బరాజు దక్షిణాది సూపర్ స్టార్ రజినీకాంత్ తో సినిమా చేస్తున్నారు. భారీ బడ్జెట్ తో సన్ పిక్చర్స్ వారు నిర్మిస్తున్న ఈ సినిమాలో హీరోయిన్ గా సిమ్రాన్ నటిస్తోంది. ఈ సినిమా తొలి షెడ్యూల్ డార్జిలింగ్ లో పూర్తి చేసుకుంది. ఇప్పుడు విదేశాల్లో పురాతన కట్టడాల మధ్యన షూటింగ్ జరుపుకుంటోంది. ఈ సినిమాలోని కొన్ని ముఖ్యమైన స్టిల్స్, వీడియో లీకుల రూపంలో బయటికి వచ్చాయి. సూపర్ స్టార్ మూవీ కావడంతో వైరల్ అయింది. ఈ లీకులపై డైరక్టర్ కార్తీక్ సుబ్బరాజు ట్విట్టర్ ద్వారా స్పందించారు. “ఒక టీవీ చానెల్ లో లీక్డ్ వీడియో చూసి షాక్ అయ్యాను.
తమిళ న్యూస్ చానెల్ తంతి టీవీ ఈ వీడియో ను ప్రసారం చేసింది. ఇది ఇలాగే కొనసాగితే ముందు ముందు పైరేటెడ్ మూవీస్ ను కూడా వార్తలుగా ప్రసారం చేసి చూపిస్తారు. ఇది వృత్తి ధర్మం కాదు” అని ఆ ఛానల్ పై మండిపడ్డారు. షూటింగ్ స్పాట్ స్టిల్స్ , వీడియో లు దయచేసి షేర్ చేయకండని చిత్ర యూనిట్ సభ్యులను వేడుకున్నారు. అంతేకాదు “మీ అందరి సపోర్ట్ కావాలి. దయచేసి షేర్ చేయవద్దు” అని నెటిజనులు, అభిమానులకు విజ్ఞప్తి చేశారు. భారీ అంచనాలతో తెరకెక్కుతోన్న ఈ మూవీ వీడియోలు నెట్లోకి రావడం తమిళ పరిశ్రమలో సైతం హాట్ టాపిక్ అయింది. మిగతా సినిమాల దర్శకనిర్మాతలు కూడా లీక్ కాకుండా జాగ్రత్త చర్యలు చేపట్టారు.
