ఎన్నిసార్లు చెప్పినా వినిపించుకోవడం లేదు : కీర్తి సురేష్

ఎప్పుడూ ఒకే విధంగా కనిపిస్తే ఆ హీరోకి క్రేజ్ తగ్గిపోతుంది. ఒకే రకమైన రోల్స్ చేస్తుంటే కొన్నాళ్లకి బోర్ కొట్టేస్తారు. హీరోయిన్స్ విషయంలోనూ దాదాపు అంతే. అందుకే దర్శకనిర్మాతలు నటీనటులతో ప్రయోగాలు చేస్తుంటారు. ఆ ప్రయోగాలు సినిమా విజయానికి దోహదం చేస్తాయి. అయితే ఈ ప్రయోగాలు ఏమోగానీ.. తాను ఎప్పుడూ చేయని పనులను చేయమని కీర్తి సురేష్ ని తెగ ఇబ్బంది పెట్టేస్తున్నారంట ఫిలిం మేకర్స్. నేను శైలజ మూవీతో కీర్తి సురేష్ తెలుగు ప్రజలకు పరిచయమయింది. నేను లోకల్ తో వరుసగా రెండు విజయాలను సొంతం చేసుకుంది. అజ్ఞాతవాసిలోను ఆకట్టుకుంది. సినీ నేపథ్యం నుంచి వచ్చిన ఈ బ్యూటీ తమిళంలోనూ రెమో వంటి విజయాలను తన ఖాతాలో వేసుకుంది.

తెలుగులో, తమిళంలో అభిమానులను సంపాదించుకున్న కీర్తి సురేష్ ని మహానటి సినిమా మరింత గొప్ప స్థానంలో నిలబెట్టింది. దీంతో ఆమెకు ఎన్నో అవకాశాలు వచ్చి పడుతున్నాయి. అందులో కథలు బాగున్నాయి కానీ ముద్దు సీన్లు ఉండడంతో ఓకే చెప్పలేకపోతోంది. ఇదివరకు ఏ సినిమాలో ముద్దు సీన్లలో నటించకపోయినప్పటికీ.. ఆ సన్నివేశాల్లో నటించనని స్పష్టం చేసినప్పటికీ దర్శకులు అటువంటి కథలనే తీసుకొస్తున్నారంట. దేంతో ఆమె చిరాకు పడుతోంది. తనని ఇంతకుముందు ఎవరూ ఆవిధంగా అడగలేదనీ, ఇటీవలే అలా అడుగుతున్నారనీ, కానీ తను అలాంటి సన్నివేశాలు చేయనని మరోసారి స్పష్టం చేసింది. కీర్తి సురేష్ ముద్దు పెడుతున్న పోస్టర్ పెట్టి తన సినిమాకి ఓపెనింగ్స్ రాబట్టుకోవాలని ఆలోచిస్తున్న డైరెక్టర్లకి ఆమె పెద్ద షాకిచ్చినట్లే అయింది. మొత్తానికి ఛాన్స్ లు లేకపోయినా తాను పెట్టుకున్న నియమాలను కీర్తి అతిక్రమించేటట్టు కనిపించడం లేదు.