దసరా పండక్కి ‘ధృవ’ సినిమాతో సందడి చేయాల్సిన రామ్ చరణ్ వెనక్కి తగ్గిన సంగతి తెలిసిందే. నటుడిగా తాను ఓ అడుగు తగ్గినా, నిర్మాతగా వెనుకంజ వేసే ఉద్దేశ్యం లేదని స్పష్టం చేశాడు. చిరంజీవి రీ ఎంట్రీ సినిమా ‘ఖైదీ నెం 150’ని కొణిదెల ప్రొడక్షన్స్ సంస్థలో రామ్ చరణ్ నిర్మిస్తోన్న సంగతి తెలిసిందే. అయితే ఈ సినిమా సంక్రాతి బరిలో నిలవడం అనుమానమే అని పుకార్లు పుట్టడంతో చెర్రీ స్వయంగా రంగంలోకి దిగి మెగాస్టార్ సినిమాపై ఫుల్ క్లారిటీ ఇచ్చాడు.
వినాయక్ దర్శకత్వంలో తెరకెక్కుతోన్న ‘ఖైదీ నెం 150’ సినిమా 70% చిత్రీకరణ పూర్తయింది. చిరు డబ్బింగ్ కూడా మొదలెట్టారట. ఈ సినిమాలో చిరు సరసన కాజల్ హీరోయిన్ గా నటిస్తుండగా అంజలి ఝవేరి భర్త తరుణ్ అరోరా విలన్ గా నటిస్తున్నారు. ఖైదీ పాత్ర చుట్టూ నడిచే కథ కావడంతో ఖైదీ అనే టైటిల్ గా ఖరారు చేశారట. తమిళ చిత్రం ‘కత్తి’కి రీమేక్ గా రూపొందుతోన్న ఈ సినిమాకి లైకా ప్రొడక్షన్స్ నిర్మాణ భాగస్వామిగా వ్యవహరిస్తోంది. ఏదేమైనా చిరు సినిమా పెద్ద పండక్కి పక్కా అన్నది చెర్రీ మాటల సారాంశం.
