నేచురల్ స్టార్ నాని, ఎస్.ఎస్.రాజమౌళి కాంబినేషన్లో వచ్చిన ‘ఈగ’ ఎంత పెద్ద సంచలనం సృష్టించిందో ప్రత్యేకంగా చెప్పనక్కర్లేదు. ఈ చిత్రం విజయంలో మేజర్ క్రెడిట్ కొట్టేసాడు కిచ్చా సుదీప్. ‘ఈగ’ చిత్రంలో విలన్ గా నటించిన సుదీప్ తెలుగు ప్రేక్షకులని కూడా బాగా ఆకట్టుకున్నాడు. ఇక అటుతరువాత ‘బాహుబలి ది బిగినింగ్’ లో కూడా కాసేపు కనిపించి అలరించాడు. ఇప్పుడు మెగాస్టార్ 151 వ చిత్రంగా రాబోతున్న ‘సైరా’ చిత్రంలో కూడా కీలక పాత్ర పోషిస్తున్నాడు. ఇక ఆయన హీరోగా రూపొందుతున్న తాజా చిత్రం ‘పహిల్వాన్’. ఈ చిత్రం తెలుగు హక్కుల్ని ప్ర‌ముఖ నిర్మాణ సంస్థ ‘వారాహి చలన చిత్రం’ అధినేత సాయి కొర్రపాటి దక్కించుకున్నారు.
సుదీప్ రెజ్ల‌ర్ పాత్ర‌లో కనిపించబోతున్న ‘పహిల్వాన్’ చిత్రం సెప్టెంబర్ 12న విడుదల కాబోతుంది. అయితే ఈ చిత్రం పై సౌత్ అన్ని భాషల్లోనూ మంచి అంచనాలు ఏర్పడ్డాయి. ఇటీవల విడుదల చేసిన ‘పహిల్వాన్’ ట్రైలర్ కు కూడా అద్భుతమైన స్పందన లభించింది. ఇదిలా ఉండగా… గతంలో కన్నడ చిత్రం ‘కె.జి.ఎఫ్’ ను కూడా ‘వారాహి చలన చిత్రం’ వారే విడుదల చేసి మంచి బ్లాక్ బస్టర్ అందుకున్నారు. ఇప్పుడు ‘పహిల్వాన్’ చిత్రాన్ని కూడా ఈ సంస్థే కొనుగోలు చేసింది కాబట్టి ‘కె.జి.ఎఫ్’లానే ‘పహిల్వాన్’ కూడా బ్లాక్ బస్టర్ అవుతుందేమో అని కొందరు ట్రేడ్ పండితులు అంచనాలు వేస్తున్నారు.
