ఇంట్లో పెళ్లీడుకు వచ్చిన కొడుకు ఉంటే సహజంగా అతని గురించే కుటుంబ సభ్యులు మాట్లాడుతుంటారు. అదే విధంగా తెలుగు చిత్ర పరిశ్రమలో ప్రభాస్ పెళ్లీడుకు వచ్చి చాలా కాలం అయింది. ప్రభాస్ తన కెరీర్ గురించి ఆలోచిస్తున్నారు.. తప్ప పెళ్లి గురించి ఆలోచించడం లేదు. మీడియా వాళ్లు కలిసినప్పుడల్లా.. ఈ విషయాన్నీ ప్రస్తావిస్తున్నప్పటికీ.. అతను మాత్రం కూల్ గా సమాధానం ఇస్తున్నారు. పోనీ గాసిప్స్ సృష్టిస్తేనైనా పెళ్లి జోలికి వెళతాడనుకుంటే… అదీ లేదు. అప్పుడు కూడా కూల్ గానే సమాధానం ఇచ్చి నోరు మూయిస్తున్నారు. తాజాగా ఆయన పెదనాన్న కృష్ణంరాజుని ప్రభాస్ పెళ్లి ఎప్పుడు అని అడిగితే.. కాస్త అసహనంగా సమాధానమిచ్చారు. “అతనే (ప్రభాస్) ఆలోచించుకోవాలి.. ముప్పై ఏళ్లు దాటాయి.. ఏమైనా చిన్నపిల్లవాడా.
పెళ్లి చేసుకో? ఎప్పుడు చేసుకుంటావు? అని అడుగుతూనే ఉంటాం. ‘పెళ్లి చేసుకుంటాను’ అని చెప్పేవరకు వదలము” అన్నారు. అంతేగానీ ఒత్తిడి చేయమని స్పష్టం చేశారు. అందుకు తమ మధ్య అనుబంధం గురించి వివరించారు. “మా కుటుంబాల్లో ఎలా ఉంటుందంటే.. కొడుకుని ఐదు సంవత్సరాల వయసు వరకు దేవుడిలా చూడాలట. ఆ తర్వాత పద్దెనిమిది సంవత్సరాల వరకు బానిసలా చూడాలట. పద్దెనిమిదేళ్ల లోపు దారిలో పెట్టాలి. పద్దెనిమిదేళ్ల తర్వాత స్నేహితుడిలా చూడాలట. అందుకే పెళ్లిపై నిర్ణయం అతనిదే” అని వివరించారు. ‘సాహో’ సినిమా తర్వాత ప్రభాస్ తో తమ సొంత బ్యానర్ పై ఓ చిత్రాన్ని తెరకెక్కించనున్నట్టు చెప్పారు. రాధాకృష్ణ దర్శకత్వం వహించనున్న ఈ మూవీ ఆగస్టులో సెట్స్ మీదకు వెళ్లనున్నట్టు చెప్పారు.
