ధూమపానం మానేసి ఫ్యాన్స్ ని ఇన్స్పైర్ చేసిన 10 మంది హీరోల లిస్ట్..!

సినిమాల్లో హీరో స్టైల్ గా సిగరెట్టు కాలుస్తుంటే.. ఆ హీరో అభిమానులు మురిసిపోతూ ఉంటారు. ‘మా హీరో చూడండ్రా.. ఎంత స్టైల్ గా సిగరెట్టు కాలుస్తున్నాడో’ అంటూ తమ స్నేహితుల దగ్గర కాలర్ ఎగరేసుకుని మరీ చెప్పుకుంటూ ఉంటారు. అక్కడితో ఆగిపోతే పర్వాలేదు.. కానీ సిగరెట్టు కాలుస్తున్న ఆ హీరోని స్ఫూర్తిగా తీసుకుని ఆ అభిమాని కూడా ధూమపానం మొదలుపెడితే తరువాత అతను చాలా ఇబ్బందులు పడాల్సి వస్తుంది. నిజ జీవితంలో చాలా మంది ఇలా అనుసరిస్తున్న వాళ్ళు కూడా లేకపోలేదు. సినిమా మొదలయ్యే ముందు ‘మద్యపానం.. ధూమపానం ఆరోగ్యానికి హానికరం’ అంటూ ఆ సినిమాలో నటించే నటీనటులతో కామెంట్రీ చెప్పించినా పట్టించుకునే వాళ్ళు చాలా తక్కువ మందే ఉన్నారు. పైగా దాని పై సెటైర్లు కూడా వేసుకునే వాళ్ళు ఎక్కువ.

ఇదిలా ఉండగా.. నిజ జీవితంలో కూడా చాలా మంది స్టార్ హీరోలు స్మోకింగ్ చేస్తూ ఉంటారు. అది బహిరంగ రహస్యమే..! అయితే కొంతమంది స్టార్ హీరోలు మొదట్లో స్మోకింగ్ చేసినప్పటికీ.. ఆ తరువాత మాత్రం ఆ అలవాటును మానేశారు. ఇప్పటివరకు మళ్ళీ దాని జోలికి పోకుండా ఎంతో మందికి ఆదర్శంగా నిలిచారు. అంతేకాదు తమ అభిమానులకు కూడా దయచేసి స్మోకింగ్ మానెయ్యండి అంటూ వినిపించుకోవడం కూడా జరిగింది. మరి స్మోకింగ్ మానేసిన ఆ హీరోలు ఎవరో తెలుసుకుందాం రండి :

1) రజినీకాంత్ :

సిగరెట్టు లేదా చుట్టని స్టైల్ గా కాల్చడంలో రజినీకి ఎవ్వరూ సాటిరారు. ఆయన స్మోకింగ్ చేసే స్టైల్ కు సెపరేట్ ఫ్యాన్ ఫాలోయింగ్ ఉంది. సినిమాల్లోనే కాకుండా నిజ జీవితంలో కూడా ఈయన స్మోకింగ్ చేసేవారు. నిజానికి ఈయన స్టైల్ గా సిగరెట్టు కాల్చడం చూసి.. ఓ పెద్దాయన రజనీని సినిమాల్లోకి తీసుకొచ్చారు. అయితే 2012 డిసెంబర్ 12న రజినీ స్మోకింగ్ చెయ్యడం మానేస్తున్నట్టు తెలియజేసారు. తన అభిమానులను కూడా దాని జోలికి పోకూడదని కోరారు. ఇందుకు ముఖ్య కారణం.. ఆయన మనవడు అని తెలుస్తుంది. రజినీ స్మోకింగ్ చేసి తన మనవడి వద్దకు వెళ్తే.. అతను రజినీ దగ్గరకు రావడం లేదట. దాంతో ఆ అలవాటుకి స్వస్తి చెప్పేసారు రజినీ.

2) కమల్ హాసన్ :

11 ఏళ్ళ వయసులోనే సిగరెట్టు కాల్చడం మొదలుపెట్టారు కమల్. అయితే కొన్నాళ్ల తరువాత ఆ అలవాటుకు స్వస్తి చెప్పారు. ‘లిప్ లాక్ లు ఎక్కువగా పెడుతుంటాను కాబట్టి హీరోయిన్లు ఇబ్బంది పడకూడదని స్మోకింగ్ కు ఫుల్ స్టాప్ పెడుతున్నాను’ అంటూ ఓ సందర్భంలో కమల్ సరదాగా దీని పై స్పందించారు.

3) మహేష్ బాబు :

తన స్నేహితుడు ఇచ్చిన ఓ పుస్తకాన్ని చదివిన తరువాత మహేష్ స్మోకింగ్ హ్యాబిట్ ను వదిలేసాడు. గతంలో ‘పోకిరి’ ‘అతిథి’ సినిమాల టైములో ఇతను గ్యాప్ లేకుండా స్మోక్ చేసేవాడట. కానీ ఇప్పుడు ఆ సన్నివేశాల్లో నటించడానికి కూడా మహేష్ ఇష్టపడటం లేదు.

4) విజయ్ దేవరకొండ :

‘అర్జున్ రెడ్డి’ సినిమా టైములో విజయ్ స్మోక్ చేసేవాడట. కానీ ఆ తరువాత ఆ అలవాటుకు దూరం అయ్యాడు.

5) పవన్ కళ్యాణ్ :

కేవలం ‘ఖుషి’ సినిమా టైములో పవన్ స్మోక్ చేసాడు. తరువాత మాత్రం ఎప్పుడూ దాని జోలికి పోలేదు.

6) రానా దగ్గుబాటి :

‘నేనే రాజు నేనే మంత్రి’ సినిమా టైం వరకూ రానా స్మోక్ చేసేవాడట. కానీ ఆ సినిమాకి డబ్బింగ్ చెప్పుకునే టైములో చాలా కష్టపడ్డాడట. డాక్టర్ సలహాతో ఆ అలవాటుకి దూరం అయినట్టు తెలుస్తుంది.

7) మమ్ముట్టి :

ఈ స్టార్ హీరో కూడా మొదట్లో స్మోకింగ్ చేసేవాడు. కానీ 7 ఏళ్ల క్రితం దానికి గుడ్ బై చెప్పాడట.

8)హృతిక్ రోషన్ :

మొదట ఇతనికి ఆ అలవాటు లేదు. కానీ కొంతకాలం తరువాత కొద్దిగా అలవాటు అయ్యింది. అయితే వెంటనే రియలైజ్ అయ్యి దానికి స్వస్తి చెప్పాడు.

9) సల్మాన్ ఖాన్ :

మన కండల వీరుడు కూడా గతంలో చైన్ స్మోకర్. కానీ తరువాత స్మోకింగ్ వల్ల ఇతని ఆరోగ్యం దెబ్బతింది.తరువాత డాక్టర్ల సలహాలతో ఆ అలవాటుకు దూరమయ్యాడు.

10) ఆమిర్ ఖాన్ :

తన పిల్లల రిక్వెస్ట్ మేరకు స్మోకింగ్ హ్యాబిట్ ను విడిచిపెట్టి మిస్టర్ పర్ఫెక్ట్ అనిపించుకున్నాడు.