ఫొటోలతో, ఫోటోషూట్ లతో రచ్చ చేసే మాళవిక మోహనన్, హీరోయిన్ గా మాత్రం సరైన కమర్షియల్ హిట్ అందుకోలేకపోతుంది. రజనీకాంత్ తో “పేట” చేసినా, విజయ్ తో “మాస్టర్” చేసినా, ప్రభాస్ తో “రాజా సాబ్” చేసినా.. ఎందుకో కమర్షియల్ హిట్ మాత్రం అందుకోలేకపోయింది. అన్నీ భారీ సినిమాలే, స్టార్ హీరోలే. అయినా ఎందుకో కమర్షియల్ హిట్ అనేది వర్కవుట్ అవ్వలేదు.
కానీ.. మధ్యలో చేసిన కొన్ని చిన్న కాన్సెప్ట్ సినిమాలు మాత్రం పర్వాలేదనిపించుకున్నాయి. అందుకే.. “రాజా సాబ్” డిజాస్టర్ అనంతరం మళ్లీ తనకు అచ్చొచ్చిన కాన్సెప్ట్ సినిమాలవైపుకి వెళ్లిపోయింది మాళవిక మోహనన్. “అరణ్య కాండం, సూపర్ డీలక్స్” సినిమాలతో దర్శకుడిగా తనకంటూ ప్రత్యేకమైన గుర్తింపు సంపాదించుకున్న త్యాగరాజ కుమార్రాజా, నిన్నటినుండి తన మూడో సినిమా షూటింగ్ మొదలుపెట్టాడు. విజయ్ సేతుపతి హీరోగా తెరకెక్కుతున్న ఈ సినిమాలో మాళవిక మోహనన్ హీరోయిన్ గా నటిస్తోంది.
రెగ్యులర్ లుక్ లో చాలా పద్ధతిగా కనిపిస్తూ ఫోటో రిలీజ్ చేసింది మాళవిక. తమిళంలో తెరకెక్కుతున్న ఈ చిత్రం.. విజయ్ సేతుపతి & మాళవికల మార్కెట్ బట్టి తెలుగులోనూ విడుదలయ్యే అవకాశాలు పుష్కలంగా ఉన్నాయి. నిజానికి మాళవిక తెలుగు ఇండస్ట్రీపై చాలా ఆశలు పెట్టుకుంది. “రాజా సాబ్” హిట్టయితే తనకు తెలుగులో వరుస ఆఫర్లు వెల్లువెత్తుతాయి అనుకుంది.
పాపం సినిమా ఫ్లాపవ్వడం, మాళవిక లుక్స్ కూడా ట్రోల్ అవ్వడంతో చేసేదేం లేక, వచ్చిన అవకాశాలు ఒప్పుకుంటూ మళ్లీ తమిళ, మలయాళ ఇండస్ట్రీవైపు వెళ్లిపోయింది. ఆల్రెడీ మూడు పదుల వయసు దాటేసిన మాళవిక నిజానికి సీనియర్ హీరోల సరసన మంచి ఆప్షన్. చిరంజీవి, అజిత్, మమ్ముట్టి లాంటి హీరోలు కన్సిడర్ చేయొచ్చు. కానీ.. సరైన సక్సెస్ లేకపోవడంతో ఆమెకు సరైన ఆఫర్లు కూడా రావడం లేదు. మరి మాళవికకి సరైన బ్రేక్ ఎప్పుడొస్తుందో చూడాలి.
