ఒకరు మనసు సాయం చేస్తే.. మనం వారికి తిరిగి ఫేవర్ చేసేయాలి అంటారు మన పెద్దలు. ఈ మాట గుర్తొచ్చి చేస్తున్నాడో లేక చేయాలని చేస్తున్నాడో తెలియదు కానీ నందమూరి బాలకృష్ణ కొత్త సినిమాలో మంచు మనోజ్ నటిస్తున్నాడు అని సమాచారం. గోపీచంద్ మలినేని దర్శకత్వంలో బాలకృష్ణ ఓ సినిమాలో నటించనున్న విషయం తెలిసిందే. కొన్ని నెలల క్రితం అనౌన్స్ అయిన ఈ సినిమా త్వరలో సెట్స్పైకి వెళ్లనుంది. దీనికి సంబంధించిన పనులు జోరుగా సాగుతున్నాయి. తొలుత అనుకున్న కథ కాకుండా వేరేది ముందుకు తీసుకురావడంతో ఆలస్యమైందని సమాచారం.
మరి కథ మార్చాక వచ్చిన ఆలోచనో, లేక ముందే ఆలోచన చేశారో కానీ.. ఈ సినిమాలో ఓ కీలక పాత్ర కోసం మంచు మనోజ్ని అడిగారు అని సమాచారం. నందమూరి, మంచు కుటుంబాల మధ్య మంచి అనుబంధం ఉంది. నందమూరి తారక రామారావు, మంచు మోహన్ బాబు కలసి కొన్ని సినిమాల్లో నటించారు. తర్వాతి తరంలోనూ ఆ అనుబంధం కొనసాగుతోంది. ఇదే ఫ్లోలో మంచు మనోజ్ ఇప్పుడు బాలకృష్ణ సినిమాలో నటించబోతున్నాడు. అంతే కాదు అది విలన్ పాత్ర అని సమాచారం.
బాలకృష్ణ, మనోజ్ మధ్య చక్కటి అనుబంధం ఉంది. గతంలో వీళ్లిద్దరూ ‘ఊ కొడతారా ఉలిక్కి పడతారా’ అనే సినిమాలో కలసి నటించారు. అందులో బాలయ్యది ఎక్స్టెండెడ్ అతిథి పాత్ర. ఆ సినిమా సరిగ్గా ఆడకపోయినా ఆ పాత్రకు బాలయ్యకు మంచి పేరొచ్చింది. బాలయ్య పేరుతో సినిమాకు మంచి ఓపెనింగ్స్ కూడా వచ్చాయి. ఇదే దానికి ఫేవర్గా మనోజ్ నటించనున్నాడు అని చెబుతున్నారు. ‘వీర సింహా రెడ్డి’ విజయం తర్వాత గోపీచంద్ – బాలయ్య చేస్తున్న సినిమా ఇది. ఆ సినిమాలో దునియా విజయ్కి విలన్గా మంచి పేరొచ్చింది. మరిప్పుడు అదే స్థాయిలో మనోజ్ పేరు సంపాదిస్తాడేమో చూడాలి. మరోవైపు మనోజ్ ‘డేవిడ్ రెడ్డి’ అనే సినిమాలో హీరోగా చేస్తున్నాడు. ఇటీవల వచ్చిన ఈ సినిమా ప్రచార చిత్రాలు ఆకట్టుకుంటున్నాయి.
