సందీప్ సినిమాలో మంజుల ఎంట్రీ ఇచ్చిందిగా..!

నటిగా నిర్మాతగా పలు సినిమాలు చేసిన ఘట్టమనేని వారసురాలు మంజుల త్వరలో మెగాఫోన్ పట్టనున్నారంటూ ఇటీవల వార్తలు వినిపించిన సంగతి తెలిసిందే. నిన్నటివరకు ఈ విషయం గుసగుసలుగానే ఉన్నా నిన్నటితో ఇది నిజమేనని రూడీ అయింది. సందీప్ కిషన్ హీరోగా నిన్న ఓ సినిమా ప్రారంభం అయింది. ఆ కార్యక్రమానికి మంజుల పతీసమేతంగా విచ్చేసి స్క్రిప్ట్ ను చిత్ర బృందానికి అందజేసింది. మామూలుగా ఇలాంటి కార్యక్రమాలలో కనిపించని ఆమె సందీప్ కోసం కాలు బయట మోపింది. వీరిద్దరి కలయికలో సినిమా ఖాయం అనడానికి ఈ సాక్ష్యం సరిపోతుంది కదూ..!

మొదలవనున్న సినిమా మాటలు కాసేపు పక్కనపెట్టి మొదలైన సినిమా విషయానికొస్తే.. ఆదినుంచి సందీప్ యాక్షన్ ప్రియుడు. అందుకే వయసుతో, సినిమా ఫలితాలతో సంబంధం లేకుండా తన సినిమాల్లో యాక్షన్ పుష్కలంగా ఉండేలా చూసుకునేవాడు. ఇప్పుడు తమిళ దర్శకుడు సుశీంద్రన్ తెరకెక్కించనున్నదీ ఆ కోవలోనే ఉంటుందట. ‘నా పేరు శివ’, ‘పల్నాడు’, ‘జయసూర్య’ వంటి అనువాద సినిమాల ద్వారా తెలుగు ప్రేక్షకులకు పరిచయమైన ఈ ప్రతిభావంతమైన దర్శకుడు యాక్షన్-థ్రిల్లర్ కలగలిపి సినిమా చేయడంలో దిట్ట. నాని నటించిన ‘భీమిలి కబడ్డీ జట్టు’ సృష్టికర్త కూడా ఇతడే. ద్విభాషా చిత్రంగా రూపొందనున్న ఈ సినిమాని లక్ష్మి నరసింహ ఎంటర్టైన్మెంట్స్ బ్యానర్ పై చిగురుపాటి చక్రి (స్వామి రారా ఫేమ్) నిర్మించనున్నారు. మెహరీన్ ఈ సినిమాతో కోలీవుడ్ లో అడుగుపెట్టనుంది. థమన్ సంగీతం అందించనున్న ఈ సినిమా షూటింగ్ డిసెంబర్ లో ప్రారంభమై ఫిబ్రవరి నాటికి పూర్తి కానుండగా థియేటర్ లోకి వచ్చేది మాత్రం మండు వేసవిలోనేనట.

https://www.youtube.com/watch?v=N4TM7oTtJUs