సినిమా పరిశ్రమలో ఎవరు విజయం సాధిస్తారో.. ఎవరు వెనక్కి వెళ్ళిపోతారో చెప్పడం చాలా కష్టం. ఒక్కొక్కరు ఒక్క సినిమాతోనే పాపులర్ అయిపోతారు. మరికొంతమంది అనేక సినిమాల తర్వాత బ్రేక్ వస్తుంది. అప్పటివరకు కష్టపడుతూనే ఉండాలి. ఇది ఆర్టిస్టులు, టెక్నీషియన్స్ కి అందరికి వర్తిస్తుంది. అయితే హీరోయిన్ కి విజయం ఆలస్యం అయితే మాత్రం ఇబ్బందే. ఎందుకంటే ఈ తరం హీరోయిన్స్ కెరీర్ సమయం తక్కువ. ఐదేళ్లు.. మహా అయితే పదేళ్లు. ఈ సమయంలోనే పేరు, డబ్బు .. రెండూ సంపాదించుకోవాలి. అందుకే తొలినాళ్లలో మంచి కథలు ఎంచుకొని హిట్ కొట్టడానికి తారలు తాపత్రయం పడుతుంటారు.
తమిళ బ్యూటీ మేఘ ఆకాష్ కూడా ఎన్నో ఆశలు పెట్టుకొని నటిగా టాలీవుడ్ లో అడుగుపెట్టింది. యువ హీరో నితిన్ తో కలిసి లై సినిమాలో హిరోయిన్గా నటించింది. ఇది విజయం సాధించలేదు. అయినా తమిళంలో అదృష్టం పరీక్షించుకోవాలని “ఏను నోకి పాయం” అనే సినిమా చేసింది. ఇది కూడా నిరాశపరిచింది. టాలీవుడ్, కోలీవుడ్ లో ఎంట్రీ బాగాలేదు. మళ్ళీ నితిన్ మేఘా ఆకాష్ ని జోడీగా చేసుకున్నారు. ఛల్ మోహన్ రంగా సినిమాలో కలిసి నటించారు. ఈ మూవీ కూడా బాక్స్ ఆఫీస్ వద్ద బోల్తాకొట్టింది. దీంతో మేఘ పూర్తిగా అప్ సెట్ అయిపోయిందంట. ఇక నటనకు గుడ్ బై చెప్పాలని నిర్ణయం తీసుకుందని సమాచారం. అయితే మూడు సినిమాలకే ఇలా అయిపోతే ఎలా ? అని స్నేహితులు దైర్యం చెబుతున్నారని తెలిసింది. మరి ఇండస్ట్రీలో కొనసాగుతుందా? వెనుతిరుగుతుందా? అనేది త్వరలోనే తెలియనుంది.
