గతేడాది ‘గాయిత్రి’ ‘మహానటి’ వంటి చిత్రాలలో కనిపించారు విలక్షణ నటుడు, డైలాగ్ కింగ్ మోహన్‌బాబు. ఇటీవల కాలుకి సర్జరీ చేయించుకుని… విశ్రాంతి తీసుకుంటూ ప్రస్తుతం మనవడు, మనవరాళ్లతో గడుపుతున్నారని గత కొద్దికాలం నుండీ వార్తలు వస్తున్నాయి. ట్విట్టర్ ద్వారా అభిమానులకి టచ్ లో ఉంటూ గడుపుతున్న మోహన్ బాబు త్వరలో ఓ తమిళ చిత్రంలో నటించబోతున్నారని తాజా సమాచారం.
కోలీవుడ్ స్టార్ సూర్య హీరోగా ‘గురు’ ఫేమ్ సుధా కొంగర డైరెక్షన్లో తెరకెక్కబోయే చిత్రంలో మోహన్‌బాబు ఓ కీలక పాత్ర పోషించబోతున్నారట. ఇప్పటికే డైరెక్టర్ సుధా కొంగర… మోహన్‌బాబు ని కలిసి కథ వినిపించారట. ఈ కథలో తన పాత్ర మోహన్‌బాబుకు బాగా నచ్చడంతో వెంటనే ఓకే చెప్పేశారట. సూర్య 38వ చిత్రంగా తెరకెక్కుతున్న ఈ చిత్రం… ఇండియన్ ఆర్మీ మాజీ కెప్టెన్, ఎయిర్ డెక్కన్ వ్యవస్థాపకుడయిన వ్యాపారవేత్త జీఆర్ గోపీనాథ్ జీవిత ఆధారంగా తెరకెక్కనుందట. ఆస్కార్ విజేత గునీత్ మోంగా ఈ చిత్రానికి సహ నిర్మాతగా వ్యవహరించనున్నారట. ప్రస్తుతం సూర్య… సెల్వరాఘవన్ డైరెక్షన్లో ‘ఎన్‌.జి.కె.’ చిత్రంలో నటిస్తున్నారు… ఇది పూర్తికాగానే సుధా డైరెక్షన్లో చిత్రం మొదలవుతుందట. ఇక ఈ చిత్రాన్ని తెలుగు, తమిళ భాషల్లో ఒకేసారి తెరకెక్కించనున్నారట. త్వరలోనే ఈ చిత్రానికి సంబందించిన అధికారిక ప్రకటన రాబోతుందని సమాచారం.
