ప్రముఖ టాలీవుడ్ నటుడు మోహన్ బాబు తాజాగా ఒక టీవీ ఛానల్ కు ఇచ్చిన ఇంటర్వ్యూలో మాజీ ముఖ్యమంత్రి నారా చంద్రబాబు నాయుడుపై సంచలన ఆరోపణలు చేశారు. చంద్రబాబు సొంత కంపెనీలలో ఒకటైన హెరిటేజ్ లో తాను కూడా పెట్టుబడిదారుడినని మోహన్ బాబు తెలిపారు. ఆరంభంలో ఎక్కువ పెట్టుబడి పెట్టానని అయితే చంద్రబాబు తనను మోసం చేశాడని మోహన్ బాబు కామెంట్లు చేశారు. చంద్రబాబు తనను హెరిటేజ్ నుంచి బయటకు పంపించాడని మోహన్ బాబు చెప్పుకొచ్చారు.
వైఎస్ రాజశేఖర్ రెడ్డి దగ్గర కూడా ఈ విషయాన్ని తాను ప్రస్తావించానని మోహన్ బాబు అన్నారు. హెరిటేజ్ గురించి మోహన్ బాబు చేసిన కామెంట్లు నెట్టింట తెగ వైరల్ అవుతున్నాయి. అన్నగారు తనను రాజ్యసభ సభ్యుడిని చేశారని అయితే చంద్రబాబు తనను ఎందుకూ పనికిరానని పక్కన పెట్టేశారని మోహన్ బాబు చెప్పుకొచ్చారు. మరోవైపు తన తరువాత మూవీ సన్నాఫ్ ఇండియాలో సామాజిక అంశాలతో పాటు రాజకీయ అంశాల గురించి ప్రధానంగా ప్రస్తావించనున్నామని మోహన్ బాబు తెలిపారు.
ఈ సినిమాకు స్క్రీన్ ప్లే అందించడానికి తాను పెన్ను పట్టానని మోహన్ బాబు తెలిపారు. తనకు దర్శకునిగా మారే ఉద్దేశం ఏ మాత్రం లేదని మోహన్ బాబు పేర్కొన్నారు. తను దర్శకుడు అయితే షూటింగ్ విషయంలో నిర్లక్ష్యంగా వ్యవహరించే వాళ్లపై చేయి చేసుకుంటానని మోహన్ బాబు వెల్లడించారు. సన్నాఫ్ ఇండియా సినిమా రిలీజ్ డేట్ కు సంబంధించిన ప్రకటన వెలువడాల్సి ఉంది.
Most Recommended Video
Home