టాలీవుడ్లో సినిమా కష్టాల గురించి మాట్లాడినా, ప్రొడ్యూసర్ కష్టాల గురించి మాట్లాడినా, వసూళ్ల గురించి మాట్లాడినా, థియేటర్ల గురించి మాట్లాడినా.. ఇలా ఏ టాపిక్ రెయిజ్ అయినా ఫైనల్గా ముగిసేది హీరోల రెమ్యూనరేషన్ల దగ్గరే. సినిమా బడ్జెట్లో అగ్ర భాగం హీరోలకే వెళ్తుంది అనేది ఎవరూ కాదనలేని నిజం. అయితే బడ్జెట్ కష్టాలకు మొత్తం హీరోలదే బాధ్యత అని చెబుతుంటారు కొంతమంది. ఈ విషయంలో అభిమానుల వెర్షన్ ఎలా ఉన్నా.. ఇప్పుడు ప్రముఖ నిర్మాత నాగవంశీ ఇచ్చిన క్లారిటీ వింటే కొత్త కోణం కనిపిస్తుంది.
సినిమా రిలీజ్ ఉంది అంటే మీడియా ముందుకొచ్చి వరుస ఇంటర్వ్యూలు, క్లారిటీలు, కాంట్రవర్శీలు ఇచ్చే నాగవంశీ.. ఇప్పుడు ‘లెనిన్’ సినిమా కోసం మరోసారి తనదైన శైలిలో బాణాలు విసురుతున్నారు. ఈ క్రమంలోనే ఓ ఇంటర్వ్యూలో ‘హీరోల రెమ్యూనరేషన్’, ‘సినిమా బడ్జెట్ పరిమితులు’ అనే టాపిక్ చర్చకు వచ్చింది. దానికి ఆయన ఇచ్చిన క్లారిటీ భలే ఉంది అని చెప్పాలి. ప్రతిసారి బడ్జెట్ గురించి మాట్లాడేటప్పుడు హీరోలను సాకుగా చెబుతారు.. ఇది సరికాదు అని క్లారిటీ ఇచ్చేశారు.
సినిమా బడ్జెట్లో హీరోకు ఎక్కువ భాగం కేటాయించడం సరైనదే. ఎందుకంటే పోస్టర్ మీద హీరో ఫొటో పెట్టుకునే ప్రచారం చేసుకుంటాం. హీరోను చూసే ప్రేక్షకులకు థియేటర్లకు వస్తారు అని అసలు మాట చెప్పారు. అలా అని హీరోల రెమ్యూనరేషన్ వల్లే మొత్తం బడ్జెట్ పెరిగిపోయింది అనడం సరికాదు. ఒకప్పుడు ఓ పెద్ద హీరో సెట్లో 15 క్యారవ్యాన్లు పెట్టి షూటింగ్ చేస్తే రోజుకు రూ.15 లక్షలు అయ్యేది. ఇప్పుడు చిన్న సినిమాకు అంత అవుతుంది. మొత్తంగా సినిమా కార్మికుల బేటాలు బాగా పెరిగాయి. మిగిలిన ఖర్చులూ పెరిగాయన్నారు.
ఏ సందర్భంలోనూ హీరోలు తమ రెమ్యూనరేషన్ విషయంలో పట్టుదలగా లేరు. సినిమా పరిస్థితి, బడ్జెట్ లెక్కలు చెబితే దానికి తగ్గట్టే రెమ్యూనరేషన్ తీసుకున్నారు/ తీసుకుంటారు కూడా. ఇలాంటి హీరోలు ఉన్న మన పరిశ్రమలో బడ్జెట్ లెక్కలు మొత్తం హీరోల మీద నెట్టేయడం సరికాదు అని నాగవంశీ చెప్పారు.
