ఆకట్టుకుంటున్న నాగార్జున చిన్ననాటి ఫోటో

దాదాసాహెబ్ పాల్కే అవార్డు గ్రహీత అక్కినేని నాగేశ్వరరావు చిన్నవయసులోనే చిత్రసీమలోకి అడుగుపెట్టారు. నటనే దైవంగా చివరిశ్వాసవరకు బతికారు. ఏఎన్నార్ తో పాటు అతని కొడుకు నాగార్జునను సైతం పాకే వయసులోనే వెండితెరపై చూపించారు. అప్పుడు మీడియా అంతగా విస్తరించలేదు కాబట్టి తెలియదు గానీ… లేకుంటే మన్మధుడి చిన్ననాటి ఎంట్రీని ఓ వేడుకలా చేసేవారు. ఇప్పటికి మించి పోయిందేమీ లేదని నెటిజన్లు నాగ్ చిన్ననాటి ఫోటోకి లైక్లు కొడుతున్నారు. వివరాల్లోకి వెళితే.. అక్కినేని నాగేశ్వరరావు, సావిత్రి కలిసి వెలుగు నీడలు సినిమా చేశారు. 1961 లో వచ్చిన ఆ సినిమా మంచి విజయాన్ని అందుకుంది.

అందులో కింగ్ నాగార్జునను మహానటి సావిత్రి ఎత్తుకొని ఉన్న ఫొటోను ఓ అభిమాని నిన్న పోస్ట్ చేశారు. ఆ చిత్రాన్ని చూసిన నాగ్ మంచి జ్ఞాపకాన్ని గుర్తు చేసినందుకు కృతజ్ఞతలు అంటూ ఫోటోని షేర్ చేశారు. ఆ ఫోటోని ఫ్యాన్స్ చూసి ఆనందపడుతున్నారు. బాగున్నారంటూ లైక్లు కొడుతున్నారు. ప్రస్తుతం నాగార్జున వర్మతో ఆఫీసర్ సినిమాని పూర్తి చేసి.. డైరక్టర్ శ్రీరామ్ ఆదిత్య దర్శకత్వంలో ఓ మల్టీ స్టారర్ మూవీ చేస్తున్నారు. వైజయంతి మూవీస్ బ్యానర్ పై అశ్విని దత్ నిర్మిస్తున్న ఈ సినిమా షూటింగ్ దశలో ఉండగా.. అదే బ్యానర్లో తెరకెక్కిన మహానటి మూవీ వచ్చే నెల రిలీజ్ కానుంది.