‘గాడ్‌ఫాదర్‌’తో రీఎంట్రీలో భారీ హిట్‌ అందుకున్నారు మోహన్‌ రాజా. ఆ సినిమాను తీర్చిదిద్దిన విధానానికి ఆయనకు మంచి మార్కులే పడ్డాయి. మరి నెక్స్ట్‌ ఏంటి? అనే ప్రశ్న చాలామంది నుండి వినిపిస్తోంది. దీనికి సమాధానం కూడా ఆయన ఆ మధ్య చెప్పేశారు. అదే నాగార్జున – అఖిల్‌ సినిమా. అయితే ఇక్కడే చిన్న మెలిక ఉందట. అందరూ అనుకుంటున్నట్లు ‘గాడ్‌ఫాదర్‌’ చూసి, లేదంటే ఆ పనితనం తెలిసి నాగార్జున.. మోహన్‌ రాజాకు అవకాశం ఇవ్వలేదు. ఇంకా చెప్పాలంటే ఈ సినిమా ఎప్పుడో ఓకే అయ్యింది.
‘తనిఒరువన్‌’ సినిమా అయిన తర్వాతే మోహన్‌రాజాతో సినిమా చేయాలని నాగార్జున అనుకున్నారట. దీనికి సంబంధించి ఇద్దరి మధ్య డిస్కషన్స్‌ చాలా రోజులే సాగాయట. అలా సినిమా స్క్రిప్ట్‌ కూడా ఓకే చేసుకున్నారట. అప్పుడే ‘లూసిఫర్‌’ రీమేక్‌ కోసం దర్శకుడిని వెతుకున్న సమయంలో మోహన్‌రాజా పేరు బయటకు వచ్చింది. మరి రాజాకి ఓకేనా అనుకుంటున్నప్పుడు నాగార్జున సినిమా పని మీద ఉన్నారు అని తెలిసిందట. దీంతో నాగ్‌ – చిరంజీవి మాట్లాడుకుని డీల్‌ సెట్‌ చేసుకుని ‘గాడ్‌ఫాదర్‌’ చేశారట.
అలా చిరంజీవి సినిమా తర్వాత నాగార్జున సినిమా కాదు. నాగ్‌ సినిమా తర్వాతే చిరు సినిమా అని చెప్పొచ్చు. ఈ విషయం పక్కనపెడితే ఎమోషన్స్‌ ఉన్న.. ఓ యాక్షన్‌ థ్రిల్లర్‌ సినిమాను నాగార్జునతో తీస్తున్నట్లు మోహన్‌రాజా చెప్పారు. అందులో అఖిల్‌ ఓ కీలక పాత్రలో నటిస్తాడట. కొన్ని నెలల క్రితం ఈ స్క్రిప్ట్‌ ఓకే చేసుకున్నారు. దీంతో మరోసారి స్క్రిప్ట్‌ మీద కూర్చుని ఏవైనా మార్పులు అవసరమైతే చేసి అప్పుడు సినిమా స్టార్ట్‌ చేస్తామని మోహన్‌రాజా చెప్పారు.
అయితే, మొన్నామధ్య నాగార్జున మాట్లాడుతూ ‘ది ఘోస్ట్’ తర్వాత ఆరు నెలల గ్యాప్‌ తీసుకుంటానని చెప్పారు. ఆ తర్వాతే కొత్త సినిమా చేస్తాం అని అన్నారు. అంటే మోహన్‌రాజాకు స్క్రిప్ట్‌ పూర్తి స్థాయిలో సిద్ధం చేసుకోవడానికి ఆరు నెలలు ఉందన్నమాట. చూద్దాం చిరును ‘గాడ్‌ఫాదర్‌’గా చూపించి ప్రేక్షకులకు కిక్‌ ఇచ్చిన మోహన్‌ రాజా.. నాగ్‌ని ఎలా చూపిస్తారో?
Most Recommended Video
ది ఘోస్ట్ సినిమా రివ్యూ & రేటింగ్!
‘బిగ్ బాస్ 6’ కపుల్ కంటెస్టెంట్స్ రోహిత్ అండ్ మెరీనా గురించి 10 ఆసక్తికర విషయాలు..!
‘బిగ్ బాస్ 6’ కంటెస్టెంట్ శ్రీహాన్ గురించి ఆసక్తికర విషయాలు..!
Home