బాలీవుడ్ మూవీ ఆధారంగా నాగ్, నాని మూవీ తెరకెక్కుతోందా?

సోషల్ మీడియా వల్ల ఏ వార్త నమ్మాలో?.. ఏది నమ్మకూడదో? అర్ధం కావడం లేదు. సినిమాల గురించి రూమర్లు మాత్రం తెగ షికారు చేస్తుంటాయి. తాజాగా నాగార్జున, నాని సినిమా గురించి కొన్నిరోజులుగా కొన్ని గాసిప్స్ పుట్టుకొస్తున్నాయి. శ్రీరామ్ ఆదిత్య దర్శకత్వంలో అశ్వనీదత్ నిర్మిస్తోన్న ఈ చిత్రం “అనలైజ్ దిస్” అనే అమెరికన్ మూవీ కథతోనే తెరకెక్కుతోందని మొదట్లో బాగా వైరల్ అయింది. అయితే సినిమా యూనిట్ ఈ వార్తలను ఖండించింది.

శ్రీరామ్ ఆదిత్య తన సొంత కథతోనే ఈ చిత్రాన్ని తెరకెక్కిస్తున్నాడని వెల్లడించింది. అయినా ఆ కాపీ ప్రచారం మాత్రం ఆగలేదు. తాజాగా ఈ మల్టీస్టారర్ మూవీ ఓ బాలీవుడ్ సినిమా ఆధారంగా రూపుదిద్దుకుంటోందని ప్రచారం మొదలయింది. శ్రీరామ్ రాఘవన్ దర్శకత్వంలో వచ్చిన ‘జానీ గద్దార్’ ఆధారంగా ఈ సినిమా వస్తోందని చెబుతున్నారు. క్రైమ్ బ్యాక్‌డ్రాప్‌లో వచ్చిన ‘జానీ గద్దార్’కు రాఘవన్ మార్పులు చేర్పులు చేసి శ్రీరామ్ ఆదిత్యకు కథ అందించాడని ఫిలిం నగర్ వాసులు చెప్పుకుంటున్నారు. మరి ఇందులో ఎంతవరకు వాస్తవం ఉందో.. చిత్ర బృందం స్పందిస్తే గానీ తెలియదు.