నాని కోసం కథ సిద్ధం చేసిన స్టార్ డైరక్టర్

అదృష్టం నాని బాడీ గార్డ్ అయింది. అతను నటిస్తే హిట్.. పట్టుకుంటే సూపర్ హిట్. హీరోగా నాని వరుసగా ఏడు విజయాలను అందుకున్నారు. తాజాగా నిర్మాతగా మరో హిట్ సొంతం చేసుకున్నారు. అందుకే నానిని పట్టుకుంటే తమకి అదృష్టం అంటుకుంటుందని దర్శకనిర్మాతలు ప్రయత్నిస్తున్నారు. మంచి కథలు పట్టుకొని క్యూ లో ఉన్నారు. కలిసి వచ్చే రోజుల్లోనే వీలైనన్ని సినిమాలు చేసేయాలని చకచకా సినిమాలు చేస్తున్నారు. ప్రస్తుతం నాని యువ దర్శకుడు మేర్లపాక గాంధీ దర్శకత్వంలో ‘కృష్ణార్జున యుద్ధం’ సినిమా చేస్తున్నారు. నాని ద్విపాత్రాభినయం చేస్తున్న ఈ చిత్ర షూటింగ్ చివరి దశకు చేరుకుంది. ఈ సినిమా తరువాత “భలే మంచిరోజు”, “శమంతకమణి” సినిమాలతో గుర్తింపు తెచ్చుకున్న దర్శకుడు శ్రీరామ్ ఆదిత్య దర్శకత్వంలో నటించనున్నారు.

వైజయంతి మూవీస్ బ్యానర్ పై అశ్విని దత్ నిర్మిస్తున్న ఈ చిత్రంలో నాగార్జున కీలక రోల్ పోషిస్తున్నారు. ఈ సినిమా ఈనెల 24న ప్రారంభం కానుంది. ఈ చిత్రం పూర్తి కాకముందే కిశోర్ తిరుమల దర్శకత్వంలో ఒక సినిమా సినిమా చెయ్యబోతున్నారు. మైత్రి మూవీ మేకర్స్ నిర్మించనున్న ఈ సినిమాకు చిత్రలహరి అనే టైటిల్ కూడా ఫిక్స్ చేశారు. మార్చిలో ఇది సెట్స్ మీదకు వెళ్లనుంది. దీని తర్వాత అవసరాల శ్రీనివాస్ కు మాట ఇచ్చారు. అయితే తాజాగా తెలిసిన విషయం ఏమిటంటే స్టార్ దర్శకుడిగా పేరున్న విక్రమ్ కె.కుమార్ నాని కి ఒక కథ చెప్పారంట. అది వినూత్నంగా ఉండడంతో ఒకే చెప్పారని తెలిసింది. ప్రస్తుతం ఈ స్క్రిప్ట్ పనుల్లోనే విక్రమ్ ఉన్నట్టు సమాచారం. మరి ఈ ప్రాజెక్ట్ ఎప్పుడు పట్టాలెక్కుతుందో ఇప్పుడే చెప్పలేము.