కొన్ని సినిమాలకు పబ్లిసిటీ పీక్ లెవల్లో చేసినా జనాలకి చేరువవ్వదు. అందుకు చాలా కారణాలు ఉండవచ్చు. కానీ.. కొన్ని సినిమాలకు మాత్రం కేవలం కాంబినేషన్ చాలు.. పబ్లిసిటీ చేసినా చేయకపోయినా సినిమా ఎప్పుడు వస్తుందా అని ప్రేక్షకులు ఎదురుచూస్తూ ఉంటారు. అలా ప్రేక్షకులు ఎప్పట్నుంచో ఎదురుచూస్తున్న సినిమా “జూలియట్ లవర్ ఆఫ్ ఇడియట్”. నవీన్ చంద్ర-నివేదా థామస్ జంటగా నటించిన ఈ చిత్రానికి సుకుమార్ శిష్యుడు అజయ్ దర్శకుడు. అనురాగ్ ప్రొడక్షన్ బ్యానర్ పై కొత్తపల్లి ఆర్.రఘుబాబు, కె.బి.చౌదరీలు సంయుక్తంగా నిర్మిస్తున్న ఈ చిత్రం డిసెంబర్ 15న ప్రపంచవ్యాప్తంగా విడుదలవుతోంది.
క్యూట్ లవ్ స్టోరీగా తెరకెక్కిన ఈ చిత్రం టెక్నికల్ రీజన్స్ కారణంగా పలుమార్లు వాయిదాపడి వచ్చేవారం విడుదలకానుంది. “జెంటిల్మన్, నిన్నుకోరి, జై లవకుశ” చిత్రాలతో హ్యాట్రిక్ హిట్ అందుకొన్న నివేదా థామస్ కథానాయికగా నటించి ఉండడంతోపాటు.. విడుదలైన ట్రైలర్, పాటలకు మంచి రెస్పాన్స్ లభించి ఉండడం, హీరోగా వరుస పరాజయాలు అందుకొన్నప్పటికీ నవీన్ చంద్రకు జనాల్లో మంచి క్రేజ్ ఉండడంతో “జూలియట్ లవర్ ఆఫ్ ఇడియట్” తప్పకుండా మంచి హిట్ అవుతుందని దర్శకనిర్మాతలు ఆశిస్తున్నారు. పైగా డిసెంబర్ 15న చెప్పుకోదగ్గ స్థాయిలో చిత్రాలేవీ లేకపోవడం కూడా ఈ చిత్రానికి ప్లస్ పాయింట్ అవ్వనుంది. సినిమా కంటెంట్ ఏమాత్రం బాగున్నా ప్రేక్షకులు కనెక్ట్ అయితే “జూలియట్ లవర్ ఆఫ్ ఇడియట్” మంచి విజయం అందుకోవడం ఖాయమని ట్రేడ్ వర్గాల టాక్. చూద్దాం మరి ఈ సినిమా ఏ స్థాయి విజయం సాధిస్తుందో.
