మాటల మాంత్రికుడు త్రివిక్రమ్ శ్రీనివాస్ గొప్ప దర్శకుడని యువ హీరో నితిన్ చెప్పారు. ఆయనతో కలిసి పనిచేయడం తన అదృష్టమని తెలిపారు. త్రివిక్రమ్ దర్శకత్వంలో తాజాగా రూపుదిద్దుకున్నసినిమా “అ ఆ”. కుటుంబ విలువల కథాంశంతో తెరకెక్కిన ఈ చిత్రంలో నితిన్, సమంతతో జత కట్టారు. ఈ సినిమా అన్ని పనులు పూర్తి చేసుకుని జూన్ 2న రిలీజ్ కావడానికి సిద్ధమైంది. ఈ సందర్భంగా నితిన్ మీడియాతో మాట్లాడారు.
” నేను “అ ఆ”లో ఆనంద విహారి అనే చెఫ్ గా నటించాను. విభిన్నఎమోషన్స్ పండించే పాత్ర చేయడం ఇదే తొలి సారి. ఇది ఒక అందమైన ప్రేమ కథ. ఎనిమిది ప్రధానమైన పాత్రలతో, ఆసక్తికరమైన మలుపులతో కథ సాగుతుంది. నేను ఇంత వరకు చేసిన సినిమాల్లో “అ ఆ” ఎక్కువ సంతృప్తిని ఇచ్చింది.” అని అన్నారు.
త్రివిక్రమ్ అత్తారింటికి దారేది, సన్నాఫ్ సత్య మూర్తి, తర్వాత చేసిన సినిమా “అ ఆ” కావడం తో దీనిపై భారీ అంచనాలున్నాయి. ఇప్పటికే మిక్కీ జె మేయర్ ఇచ్చిన పాటలు యువతను ఆకట్టుకున్నాయి. సినిమా టీజర్ కు మంచి స్పందన వచ్చింది. “అ ఆ” తో త్రివిక్రమ్ హ్యాట్రిక్ హిట్ కొట్టడం ఖాయమని నితిన్ అభిమానులు ధీమాగా చెబుతున్నారు.
