అత్తారింటికి దారేది, సన్నాఫ్ సత్య మూర్తి, తర్వాత మాటల మాంత్రికుడు త్రివిక్రమ్ శ్రీనివాస్ చేసిన సినిమా “అ ఆ”. కుటుంబ విలువల కథాంశంతో తెరకెక్కిన ఈ చిత్రంలో నితిన్, సమంతతో జత కట్టారు. ఈ సినిమా అన్ని పనులు పూర్తి చేసుకుని జూన్ 2న రిలీజ్ కావడానికి సిద్ధమైంది. చిత్రం ప్రమోషన్లో బిజీగా ఉన్న నితిన్ ఓ వీడియో ఇంటర్వ్యూ కు బయలు దేరుతుండగా పవన్ నుంచి అతని ఫోన్ కి కాల్ వచ్చింది. పవర్ స్టార్ ఫోన్ చేశారనగానే అభిమానిగా ఆనందపడిపోయాడు.
రెండు రోజుల క్రితం జరిగిన ఈ సంఘటన గురించి నితిన్ మాట్లాడుతూ.. “నేను వీడియో ఇంటర్వ్యూ కోసం రెడీ అవుతుండగా నా ఫోన్ స్క్రీన్ పై పవన్ కళ్యాణ్ సార్ పేరు బ్లింక్ అవుతూ కనిపించింది. ఆనందం వేసింది. వెంటనే లిఫ్ట్ చేశాను. అవతల డైరెక్టర్ త్రివిక్రమ్ గారు ఉన్నారు. నా ఇంటర్వ్యూ చక్కగా సాగాలని విషెష్ చెప్పారు. మరింత ఉత్సాహంగా ఉంటుందని పవన్ సెల్ నుంచి కాల్ చేసినట్లు డైరెక్టర్ గారు తెలిపారు. అది నిజమే పవర్ స్టార్ పేరు వింటేనే తెలియని ఎనర్జీ వస్తుంది.” అని చెప్పారు.
“అ ఆ” సినిమా సెన్సార్ బోర్డ్ నుంచి క్లీన్ యు సర్టిఫికెట్ అందుకుని ఫ్యామిలీ మూవీగా స్టాంప్ వేసుకుంది. ఈ సినిమాను కుటుంబ సభ్యులందరూ కలిసి ఎంజాయ్ చేస్తారని, త్రివిక్రమ్ “అ ఆ” తో హ్యాట్రిక్ హిట్ కొట్టడం ఖాయమని చిత్ర యూనిట్ బలంగా విశ్వశిస్తోంది.
