గతేడాది ఆగష్టు లో విడుదలైన ‘శ్రీనివాస కళ్యాణం’ చిత్రం తర్వాత నితిన్ నుండీ మరో చిత్రం రాలేదు. ‘ఛలో’ దర్శకుడు వెంకీ కుడుముల డైరెక్షన్లో ఓ చిత్రం చేయబోతున్నాడన్న సంగతి అందరికీ తెలిసిందే. జూన్ 12 నుండీ ఈ చిత్రం మొదలు కానుందని సమాచారం. ఈ ప్రాజెక్ట్ తో పాటూ మరో ప్రాజెక్ట్ కూడా నితిన్ పట్టాలెక్కించి అవకాశం ఉందని తెలుస్తుంది. ఇదిలా ఉండగా ఇప్పుడు ఓ ప్లాప్ డైరెక్టర్ వినిపించిన కథకు నితిన్ గ్రీన్ సిగ్నల్ ఇచ్చాడట. ఇప్పుడు ఈ వార్త ఫిలింనగర్లో తెగ చక్కర్లు కొడుతుంది.
సిద్దార్థ్ తో ‘కొంచెం ఇష్టం కొంచెం కష్టం’ అనే చిత్రంతో పరిచయమయ్యాడు కిశోర్ పార్థసాని (డాలీ). ఇక అటు తరువాత నాగచైతన్య తో ‘తడాకా’, పవన్ కళ్యాణ్ తో ‘గోపాల గోపాల’ ‘కాటమరాయుడు’ వంటి చిత్రాలను తెరకెక్కించాడు. అయితే ‘కాటమరాయుడు’ చిత్రం డిజాస్టర్ కావడంతో ఈ డైరెక్టర్ కు ఏ హీరో అవకాశం ఇవ్వలేదు. ఇప్పుడు డాలీ నితిన్ కోసం ఓ కథని రెడీ చేసాడట. ఇటీవల నితిన్ ని కలిసి కథ కూడా వినిపించాడట డాలీ. స్వయంగా పవన్ రికమెండ్ చేయడం వలనే నితిన్ డాలీ కథను ఓకే చేసాడని గుసగుసలు వినిపిస్తున్నాయి. ఈ ప్రాజెక్ట్ కు సంబందించిన పూర్తి వివరాలు త్వరలో బయటకి రానున్నాయని సమాచారం.
