హెడ్డింగ్ చూసి తెలుగులో అగ్ర కథానాయకుడైన కింగ్ అక్కినేని నాగార్జునకు ఇక్కడ సినిమా లేకపోవడం ఏమిటి అని కంగారుపడుతున్నారా? మీరు నమ్మినా నమ్మకపోయినా ఇది మాత్రం నిజంగానే నిజం. మన మన్మధుడు నటించిన “దేవదాస్” విడుదలై రెండు నెలలు కావస్తున్నా ఇప్పటివరకూ తెలుగులో ఒక్కటంటే ఒక్క సినిమా కూడా కన్ఫర్మ్ చేయలేదు. అయితే.. తమిళంలో ధనుష్ హీరోగా తెరకెక్కుతున్న ఓ చిత్రం, మలయాళంలో ప్రియదర్శన్ దర్శకత్వంలో ఒక సినిమా మరియు హిందీలో రణబీర్ కపూర్ హీరోగా రూపొందుతున్న మరో చిత్రంలోనూ నాగార్జున ముఖ్యపాత్ర పోషిస్తున్నాడు.
తమిళ, మలయాళ, హిందీ భాషల్లో రూపొందుతున్న భారీ చిత్రాల్లో నాగార్జున ముఖ్యపాత్రలు పోషించడం బాగానే ఉంది కానీ.. తెలుగులో ఎందుకు ఒక్క సినిమా సైన్ చేయలేదు అనేది మాత్రం ఆయన అభిమానులను బాధపెడుతున్న విషయం. “బంగార్రాజు” స్క్రిప్ట్ నాగార్జున ఆశించిన విధంగా రాకపోవడం, రెగ్యులర్ మాస్ ఫార్మాట్ సినిమాలు చేయకూడదు అని డిసైడ్ అవ్వడం వంటి కారణాల చేత నాగార్జున తెలుగులో ఇప్పటివరకూ ఏ సినిమా సైన్ చేయలేదు. సో, అర్జెంట్ గా మన కింగ్ నాగార్జున ఏదో ఒక మంచి తెలుగు సినిమా సైన్ చేస్తే చూడాలని ఉంది. వింటున్నారా నాగార్జున గారూ..!!
