ఎన్టీఆర్ బయోపిక్ ఫస్ట్ లుక్ పై నెటిజనుల కామెంట్

గౌతమీపుత్ర శాతకర్ణి సినిమాకోసం ఎంతగా కష్టపడ్డారో.. అంతకంటే రెట్టింపు శ్రమని ఎన్టీఆర్ బయోపిక్ కోసం డైరక్టర్ క్రిష్ దారపోస్తున్నారు. తెలుగు సినిమా ఉన్నంతకాలం ఎన్టీఆర్ ని ఎలా గుర్తించుకుంటారో అలాగే బయోపిక్ ని కూడా గుర్తించుకోవాలని కష్టపడుతున్నారు. మనదేశం సినిమాతోనే నటుడిగా ఎన్టీఆర్ ప్రస్థానం మొదలయింది. అందుకే అదే గెటప్ తోనే సినిమా షూటింగ్ మొదలెట్టారు. షూటింగ్ మొదలైన రోజే ఆ లుక్ ని రిలీజ్ చేశారు. అయితే ఫస్ట్ లుక్ మాత్రం అధికారికంగా ఈరోజు విడుదల చేశారు. రేపు స్వాతంత్య దినోత్సవం సందర్భంగా నేతగా ఉన్న ఎన్టీఆర్ లుక్ ని పోస్ట్ చేశారు.

ఇందులో కాషాయ రంగు దుస్తుల్లో ఎన్టీఆర్‌ లాగే మైక్‌ ముందు నిల్చుని మాట్లాడుతూ కనిపించారు. ఆయన వెనుక త్రివర్ణ జెండా ఉంది. ఈ ప్రచార చిత్రం ప్రస్తుతం సోషల్‌మీడియాలో అభిమానుల్ని ఆకట్టుకుంటోంది. బాలకృష్ణ ఎన్టీఆర్ గా మారిన విధానం చూసి అందరూ ఆశ్చర్యపోతున్నారు. ఎన్టీఆర్ పై నుంచి దిగివచ్చారా? అని అభినందనలు గుప్పిస్తున్నారు. ప్రతిష్ఠాత్మకంగా రూపుదిద్దుకుంటోన్న ఈ చిత్రంలో బసవతారకం పాత్రలో విద్యాబాలన్‌, నారా చంద్రబాబు నాయుడు పాత్రలో రానా, నారా భువనేశ్వరిగా మంజిమా మోహన్‌ నటిస్తున్నారు. యన్‌.బి.కె. ఫిలింస్‌ పతాకంపై బాలయ్య నిర్మిస్తున్న ఈ సినిమాను సంక్రాంతికి ఈ సినిమాను ప్రేక్షకుల ముందుకు తీసుకురావడానికి సన్నాహాలు చేస్తున్నారు.