యంగ్ టైగర్ ఎన్టీఆర్ ఈ ఏడాది ఫుల్ ఫామ్లోకి వచ్చారు. ఈ సంవత్సరం సంక్రాంతి కి “నాన్నకు ప్రేమతో” చిత్రంతో పలకరించి మంచి వసూళ్లను రాబట్టారు. హిట్ డైరెక్టర్ కొరటాల శివ దర్శకత్వంలో ఆయన చేసిన తాజా చిత్రం జనతా గ్యారేజ్ టాలీవుడ్ లోని రికార్డులను తిరగ రాస్తోంది. ప్రపంచవ్యాప్తంగా సెప్టెంబర్ 1న గ్రాండ్ గా విడుదలైన ఈ సినిమా కలక్షన్ల వర్షం కురిపిస్తోంది. మైత్రీ మూవీ మేకర్స్ నిర్మించిన ఈ ఫిల్మ్ కి రెండు తెలుగు రాష్ట్రాల్లోనే కాకుండా కర్ణాటక, కేరళ, విదేశాల్లోనూ మంచి ఆదరణ లభిస్తోంది.
మంచి కథ, తారక్ , మోహన్ లాల్ నటన, సమంత, నిత్యా మీనన్, కాజల్ అందాలు, దేవీ శ్రీ ప్రసాద్ సంగీతం, కొరటాల దర్శకత్వ ప్రతిభ ఈ సినిమాను టాలీవుడ్ టాప్ గ్రాసర్ జాబితాలో చేర్చింది. జనతా గ్యారేజ్ విడుదలై 20 రోజులు కూడా కాక ముందే అత్యధిక కలక్షన్స్ రాబట్టి బాహుబలి – బిగినింగ్, శ్రీమంతుడు సరసన చేరింది. మరికొన్ని రోజుల్లో మొదటి స్థానంలో నిలువనుందని ట్రేడ్ వర్గాల వారు అంచనా వేస్తున్నారు. దీంతో చిత్ర బృందం సంబరాలు జరుపుకుంటోంది.
