నందిని రెడ్డి దర్శకత్వంలో సమంత టైటిల్ పాత్రలో రూపొందుతున్న చిత్రం “ఓ బేబీ”. జులై 5న ప్రపంచవ్యాప్తంగా విడుదలవుతున్న ఈ చిత్రంలో సమంత సరసన నాగశౌర్య కథానాయకుడిగా నటించిన ఈ చిత్రంలో రావురమేష్, రాజేంద్రప్రసాద్, లక్ష్మీలు కీలకపాత్రలు పోషిస్తున్నారు. ఓ కొరియన్ సిరీస్ ఆధారంగా తెరకెక్కుతున్న ఈ చిత్రంపై మొదట్లో పెద్దగా అంచనాలేమీ లేవు. టీజర్, సాంగ్స్ కూడా కనీస స్థాయి ఆసక్తిని కలిగించలేకపోయాయి. అయితే.. ఇవాళ విడుదలైన ట్రైలర్ మాత్రం ఆసక్తి రేకెత్తించడమే కాక.. అంచనాలను కూడా పెంచింది.
నేటివిటీ టచ్ మరియు నందిని రెడ్డి మార్క్ ఎమోషన్స్ సినిమాలో పుష్కలంగా ఉన్నాయని ట్రైలర్ తో గట్టిగానే చెప్పారు. అలాగే.. ఫ్యామిలీ ఆడియన్స్ కు కావాల్సిన ఆరోగ్యకరమైన కామెడీ కూడా పుష్కలంగా ఉంది. ముఖ్యంగా సమంత ట్రైలర్ లో మంచి హజ్బెండ్ అంటే ఎలా ఉండాలనుకొంటున్నావ్ అనే ప్రశ్నకు సమాధానంగా “చూడ్డానికి అందంగా ఉండాలి, నేనేం కొనుక్కోవాలన్నా ఆడి దగ్గర సరిపడా డబ్బులుండాలి, మంచం ఎక్కితే మగాడిలా కాపురం చేయాలి” అని చెప్పిన డైలాగ్ హైలైట్ గా నిలిచింది. మరి సినిమాని జనాలు ఎలా రిసీవ్ చేసుకొంటారు అనేది తెలియాలంటే జూలై 5 వరకు వెయిట్ చేయాల్సిందే.
