ఓం నమో వెంకటేశా షూటింగ్ మొదలు

అన్నమయ్య, శ్రీ రామ దాసు, షిరిడి సాయి సినిమాల తర్వాత కింగ్ నాగార్జున చేస్తున్నమరో భక్తి రస కథా చిత్రం “ఓం నమో వెంకటేశా”. ఈ సినిమాలో నాగార్జున హథీ రామ్ బాబా పాత్ర పోషించనున్నారు. దర్శకేంద్రుడు కె.రాఘవేంద్ర రావు దర్శకత్వంలో తెరకెక్కతున్నఈ చిత్రం షూటింగ్ నేటి (శనివారం) ఉదయం ప్రారంభమైంది. అన్నపూర్ణ స్టూడియోలో వేసిన తిరుమల సెట్ లో వేంకటేశ్వరస్వామి, భక్తుడు హథీ రామ్ బాబాలపై తొలి షాట్ చిత్రీకరించారు. ఈ విషయాన్నినాగ్ సోషల్ మీడియా వేదికపై స్వయంగా వెల్లడించారు. జె.కె. భారవి కథ అందిస్తున్న ఈ సినిమాలో వెంకటేశ్వరుడిగా హిందీ నటుడు సౌరభ్ రాజ్ జైన్, శ్రీదేవిగా విమలా రామన్, భూదేవిగా పావని గంగి రెడ్డి నటిస్తున్నారు. అనుష్క సన్యాసిగా కనిపించనుంది.

ఎ. మహేష్ రెడ్డి తన సొంత ఎఎంఆర్ సాయి కృప ఎంటర్టైన్మెంట్స్ బ్యానర్ పై నిర్మిస్తున్నఈ సినిమాకు ఎం.ఎం.కీరవాణి స్వరాలను సమకూర్చనున్నారు. ఇప్పటికే కీరవాణి రెండు పాటలను కంపోజ్ చేశారని సమాచారం. నాగార్జున ఏడుకొండల స్వామి భక్తునిగా నటించిన అన్నమయ్య సినిమాను ఆదరించినట్లుగానే “ఓం నమో వెంకటేశా”కు కూడా అభిమానులు జేజేలు పలుకుతారని చిత్రబృందం ఆశిస్తోంది.

With the blessings of Lord Venkateswara started the shoot for#OmNamoVenkatesaya this morning/loving the experience!! pic.twitter.com/gvfCjvT6ih

— Nagarjuna Akkineni (@iamnagarjuna) July 2, 2016