నాగశౌర్య కథానాయకుడిగా ఎన్ని సినిమాల్లో నటించినా కూడా అతడికి హీరోగా గుర్తింపు తెచ్చిన సినిమా మాత్రం “ఊహలు గుసగుసలాడే” చిత్రం ద్వారానే. అందుకే ఆ సినిమా అన్నా, ఆ సినిమా డైరెక్టర్ అవసరాల శ్రీనివాస్ అన్నా శౌర్యకి విశేషమైన రెస్పెక్ట్. ఆ రెస్పెక్ట్ తోనే నారా రోహిత్ తో కలిసి “జో అచ్యుతానంద” సినిమాలో నటించాడు. ఆ సినిమా బాక్సాఫీస్ దగ్గర ఫెయిల్ అయినప్పటికీ అవసరాలతో ఉన్న బంధం మాత్రం పాడవ్వలేదు. ఆ అనుబంధంతోనే అవసరాల దర్శకత్వంలో మరో సినిమాలో నటించేందుకు ఒప్పుకున్నాడు నాగశౌర్య.
ఊహలు గుసగుసలాడే తరహాలోనే ఓ క్లీన్ లవ్ స్టోరీగా ఈ సినిమా తెరకెక్కనుందని తెలుస్తోంది. అవసరాల శ్రీనివాస్ దర్శకత్వంలో తెరకెక్కిన మునుపటి రెండు చిత్రాలను నిర్మించిన సాయి కొర్రపాటే ఈ చిత్రాన్ని కూడా నిర్మిస్తారట. ప్రస్తుతం ప్రీప్రొడక్షన్ వర్క్ జరుపుకొంటున్న ఈ చిత్రం రెగ్యులర్ షూటింగ్ ఎప్పుడు మొదలవుతుంది? స్టార్ క్యాస్ట్ ఎవరు అనేది తెలియాలంటే కొన్ని రోజులు వెయిట్ చేయాల్సిందే. శౌర్య ప్రస్తుతం సన్నబడే పనిలో ఉన్నాడు. మనోడు ఒక షేప్ కి రాగానే ప్రొజెక్ట్ మొదలవుతుంది.
