సినిమా పరిశ్రమలో చాలామంది సెంటిమెంట్లు బాగా ఫాలో అవుతుంటారు. మొన్నామధ్య చెప్పినట్లు కొబ్బరికాయ నుండి గుమ్మడికాయ వరకు అన్నింటా సెంటిమెంట్లే. అలా ఈ రెండు కార్యక్రమాల మధ్య జరిగే చాలా ప్రక్రియల్లో పక్కాగా సెంటిమెంట్‌ పాటించే నందమూరి బాలకృష్ణ (Balakrishna) , అతని సినిమా టీమ్‌లు మరోసారి అదే పని చేస్తున్నాయి. ఈ సినిమా టైటిల్‌ కోసం ‘వీర’ సెంటిమెంట్‌ను ఫాలో అవుతున్నారట. బాలకృష్ణ తన 109వ చిత్రాన్ని దర్శకుడు కొల్లి బాబీ (K. S. Ravindra) దర్శకత్వంలో చేస్తున్న విషయం తెలిసిందే. ఈ సినిమా పేరే ఓకే అయ్యింది అంటున్నారు.
మామూలుగా అయితే బాలయ్య సినిమాకు ‘సింహా’ (Simha) అనే పేరు వచ్చేలా చూసుకుంటారు. దీని కోసం తెలుగులో ‘సింహాలు’ అయిపోయి… మొన్నీమధ్య అనిల్ రావిపూడి (Anil Ravipudi) హిందీలోకి వెళ్లి ‘కేసరి’ (Bhagavath Kesari) తీసుకొచ్చారు కూడా. ఇప్పుడు బాబీ అయితే బాలయ్య సంక్రాంతి హిట్ సెంటిమెంట్‌ ‘వీర’ను తీసుకుంటాం అనుకుంటున్నారట. బాలయ్య కొత్త సినిమాకు మాస్‌తనం ఉట్టిపడేలా ‘వీర మాస్’ అనే పేరు పరిశీలిస్తున్నారట. ఈ మేరకు త్వరలో అప్‌డేట్‌ వస్తుంది అంటున్నారు.
ఉగాది కానుకగా బాలయ్య కొత్త సినిమా టైటిల్‌ అనౌన్స్‌ చేస్తారు అని అంటున్నారు. దీని కోసం గతేడాది బాలయ్య బ్లాక్‌బస్టర్‌ ‘వీరసింహా రెడ్డి’ (Veera Simha Reddy) స్ఫూర్తితో ‘వీర మాస్’ అనే పేరు ఓకే అనుకుంటున్నారట. అయితే అభిమానునలకు మాత్రం ‘వీరభద్ర’ సినిమా గుర్తొస్తోంది. బాలకృష్ణను ఎలాంటి పాత్రలో చూడకూడదు అని అనుకుంటున్నావ్‌ అని ఏ అభిమానినైనా అడిగితే చెప్పే సినిమాల పేర్లలో ‘వీరభద్ర’ ఒకటి. దీంతో ఆ సినిమా పేరు టచ్‌ చేసేలా టైటిల్‌ వద్దు అని అభిమానులు అనుకుంటున్నారు.
దీంతో బాలయ్య మరోసారి ‘వీర’ గా వస్తాడో లేదో చూడాలి. సితార ఎంటర్టైన్మెంట్స్ నిర్మిస్తున్న ఈ సినిమాలో బాలయ్య ఊరమాస్ పాత్రలో కనిపిస్తాడని టాక్‌. నెవర్‌ బిఫోర్‌ బాలయ్యను ఈసారి ప్రేక్షకులకు చూపిస్తా అని దర్శకుడు బాబీ మాటిస్తున్నాడు. చిరంజీవిని ‘వాల్తేరు వీరయ్య’గా చూపించిన మెప్పించింది బాబీనే అనే విషయం మీకు తెలిసిందే.
