ఒక్కోసారి కొన్ని సినిమాలు భలే సర్ప్రైజ్ ఇస్తాయి. అలాంటి సినిమానే ప్రస్తుతం హాట్ స్టార్ యాప్ లో స్ట్రీమ్ అవుతున్న “పడక్కలం”. మిస్టికల్ మిస్టరీ డ్రామాగా తెరకెక్కిన ఈ చిత్రం థియేటర్లలో ఆశించిన స్థాయిలో ఆడకపోయినా.. ఓటీటీ ప్లాట్ ఫార్మ్ లో మాత్రం ఆడియన్స్ ను విశేషంగా ఆకట్టుకుంటుంది. ఇంతలా అలరిస్తున్న ఈ చిత్రం కథ ఏంటి? ఆకట్టుకుంటున్న అంశాలు ఏంటి? అనేది చూద్దాం..!!
కథ: ఓ కాలేజ్ లో సిన్సియర్ ప్రొఫెసర్ షాజీ (సూరజ్), అదే కాలేజ్ లో తెలివైన ప్రొఫెసర్ గా అందరి మన్ననలు పొందుతూ పాపులర్ ప్రొఫెసర్ గా పేరొందుతాడు రెంజిత్ (షరాఫ్ ఉద్దీన్). వీళ్లిద్దరి మధ్య ఒకానొక సందర్భంలో ఇరుక్కుంటాడు జితిన్ (సందీప్ ప్రదీప్).
రెంజిత్ కి కొన్ని స్పెషల్ పవర్స్ ఉన్నాయని తెలుసుకుంటాడు జితిన్. అతడి నుంచి ఆ శక్తులు లాక్కునే క్రమంలో షాజీ-రెంజిత్-జితిన్ ఒక విచిత్రమైన సంఘటనలో ఒకరి శరీరంలోకి మరొకరి ఆత్మ పరకాయ ప్రవేశం జరిగిపోతుంది.
ఆ తర్వాత ఏం జరిగింది? ఎలాంటి పరిస్థితులు చవిచూడాల్సి వచ్చింది? దీన్ని మళ్లీ జతిన్ ఎలా సెటిల్ చేశాడు అనేది “పడక్కలం” కథాంశం.
నటీనటుల పనితీరు: ముగ్గురిలో రెంజిత్ పాత్ర పోషించిన షరాఫ్ ఉద్దీన్ విశేషంగా ఆకట్టుకున్నాడు. అతడి పాత్రలో రెండు విభిన్నమైన వేరియేషన్స్ ను చాలా బాగా పలికించాడు. అలాగే.. సందీప్ ప్రదీప్ కూడా మంచి నటనతో అలరించాడు. ఫస్టాఫ్ లో చాలా నార్మల్ గా ఉండే అతడి పాత్ర, సెకండాఫ్ కి వచ్చేసరికి భారీ ఛేంజోవర్ తో సినిమాకి మెయిన్ ఎసెట్ గా మారుతుంది.
ఇక సూరజ్ పాత్ర రెండు కోణాల్లోనూ కామెడీ క్యారెక్టర్ గానే ఉంటుంది. ఆ వేరియేషన్స్ ను డీసెంట్ గా పండించాడు సురాజ్.
ఇక స్నేహితుల పాత్రల్లో నటించిన కుర్రాళ్లు మరియు సురాజ్ భార్యగా నటించిన పూజా మోహన్ రాజ్ కనిపించిన కొన్ని సన్నివేశాలతోనూ ఆకట్టుకుంది.
సాంకేతికవర్గం పనితీరు: చాలా చిన్నపాటి సీజీ వర్క్ ఉన్నప్పటికీ.. కథ, కథనాన్ని ఏమాత్రం డిస్టర్బ్ చేయకుండా, ఆడియన్స్ ను సినిమా నుంచి డిస్కనెక్ట్ చేయకుండా డీసెంట్ బడ్జెట్ లో మంచి అవుట్ పుట్ ఇచ్చారు. సినిమాటోగ్రఫీ & ఎడిటింగ్ వర్క్ చాలా ప్లాన్డ్ గా ఉంది.
రాజేష్ మురుగేశన్ నేపథ్య సంగీతం బాగుంది. కామెడీ & సస్పెన్స్ ను బాగా ఎలివేట్ చేశాడు.
దర్శకుడు మను స్వరాజ్.. సినిమా ఓపెనింగ్ లో మిస్టికల్ ఎలిమెంట్ ను ఇంట్రడ్యూస్ చేసి, ట్విస్టులతో ఫన్ జనరేట్ చేసిన విధానం బాగుంది. ముఖ్యంగా ముఖ్యపాత్రధారులు ఒకరి శరీరంలోకి మరొకరు పరకాయ ప్రవేశం చేసిన తర్వాత వచ్చే సన్నివేశాల్లో సీరియస్ నెస్ తోపాటు కామెడీని పండించిన విధానం బాగుంది. అలాగే.. ఎమోషనల్ గా సినిమాని నడిపిన విధానం కూడా అలరిస్తుంది. ఓవరాల్ గా.. లాజిక్స్ తో మ్యాజిక్ చేసి ప్రేక్షకుల్ని ఆకట్టుకున్నాడు దర్శకుడు మను స్వరాజ్.
విశ్లేషణ: మ్యాజికల్ మిస్టరీతో అలరించడం అనేది కొంచం ఈజీ టాస్క్ అనే చెప్పొచ్చు. అయితే.. దానికి కూడా సందర్భం, ఎమోషన్ సరిగ్గా కుదరాలి. అలా అన్నీ సమపాళ్లలో కాకపోయినా, ఓ మోస్తరుగా సెట్ అయిన సినిమా “పడక్కలం”. మంచి హ్యూమర్ ఉన్న ఈ సినిమాని ఫ్యామిలీ అందరూ కలిసి హ్యాపీగా జియో హాట్ స్టార్ లో చూడొచ్చు.
ఫోకస్ పాయింట్: టైంపాస్ మిస్టికల్ డ్రామా!
రేటింగ్: 2.5/5
