పవన్ కళ్యాణ్ పై ఆశలు పెట్టుకున్న అల్లు అర్జున్, రవితేజ

“టచ్ చేసి చూడు” తర్వాత మాస్ మహారాజ్ రవితేజ చేస్తున్న మూవీ నేల టికెట్టు. ‘సోగ్గాడే చిన్ని నాయన, రారండోయ్ వేడుక చూద్దాం’ వంటి విజయాల్ని అందుకున్న కళ్యాణ్ కృష్ణ కురసాల దర్శకత్వంలో తెరకెక్కుతోన్న ఈ మూవీ షూటింగ్ చివరి దశకు చేరుకుంది. రామ్ తాళ్లూరి నిర్మిస్తున్న ఈ చిత్రం ద్వారా మాళవిక శర్మ హీరోయిన్ గా తెలుగువారికి పరిచయం కాబోతోంది. ఫిదా’ ఫేమ్ శక్తి కాంత్ సంగీతం అందించిన ఈ మూవీ ఆడియో వేడుక రేపు వైభవంగా జరుగనుంది. ఈ వేడుకకు పవన్ కళ్యాణ్ ముఖ్య అతిధిగా రాబోతున్నారు. రేపు ఇదే సమయానికి స్టైలిష్ స్టార్ అల్లు అర్జున్, వక్కంతం వంశీ కలయికలో వచ్చిన నా పేరు సూర్య విజయోత్సవం జరగనుంది. గతవారం రిలీజ్ అయి మిశ్రమ స్పందన అందుకున్న ఈ చిత్రం కలక్షన్ల పరంగా బన్నీ స్థాయిని అందుకోలేకపోయింది.

ఈ లోటుని పూడ్చడానికి పవన్ ని ఆశ్రయించారు. గతంలో “చెప్పను బ్రదర్” అంటూ పవన్ ఫ్యాన్స్ కి కోపాన్ని తెప్పించిన బన్నీ ఇప్పటికీ ఆ మూల్యం చెల్లించుకుంటున్నారు. ఈ వేడుకకు పవన్ ని ఆహ్వానించి తన తప్పుని సరిదిద్దుకోనున్నారు. ఇక రవితేజ గత చిత్రం టచ్ చేసి చూడు ఆశించినంత విజయం సాధించలేదు. ఈ సినిమా ఎలాగైనా హిట్ కావాలనే ఉద్దేశంతో పవన్ ని నమ్ముకున్నారు. ఆడియో వేడుకకి పవన్ రావడం సినిమా విజయానికి చాలా దోహదపడుతుందని సినీ విశ్లేషకులు అంచనావేస్తున్నారు. ఒకే రోజు రెండు వేడుకల్లో పవన్ ఎలా మెరుస్తారో అని అందరూ ఆసక్తిగా ఎదురుచూస్తున్నారు.