అన్నయ్య సినిమా వెనుక తమ్ముడు..!!

మెగాస్టార్ చిరంజీవి, పవర్ స్టార్ పవన్ కళ్యాణ్ ల మధ్య మంచి అనుబంధం ఉంది. అన్న తమ్ముళ్ల కంటే స్నేహితులుగానే మెలుగుతారు. మెగా ఫ్యామిలీ నుంచి ఇంతమంది హీరోలు రాక వెనుక చిరు శ్రమ ఉంది. ఆ కష్టాన్ని దగ్గరుండి చూసిన పవన్ ప్రస్తుతం అన్న సినిమా విజయం కోసం తనవంతు కృషి చేస్తున్నారు. తొమ్మిదేళ్ల తర్వాత చిరంజీవి వెండి తెరకు రీ ఎంట్రీ ఇస్తున్నారు. తండ్రి 150 వ సినిమాను ప్రతిష్టాత్మకంగా తెరకెక్కించాలని, ఎక్కడా కాంప్రమైజ్ కాకూడదని తనయుడు రామ్ చరణ్ తేజ్ స్వయంగా నిర్మిస్తున్నారు.

చిరు సతీమణి సురేఖ ఈ చిత్రాన్ని స‌మ‌ర్పిస్తున్నారు. కుటుంబమంతా ఈ సినిమా సూపర్ హిట్ కావాలని తపిస్తున్నారు. కుటుంబ సభ్యులు ప్రత్యక్షంగా కష్టపడుతుంటే పవన్ కళ్యాణ్ మాత్రం వెనుక నుంచి అండగా నిలుస్తున్నాడు. మొదట్లో 150వ సినిమాకు స‌రైన స్టోరీ దొర‌క‌క చిరు  ఇబ్బంది పడుతుంటే ‘కత్తి’ని రీమేక్ చేయాలని సూచించింది పవర్ స్టార్ అని తాజా సమాచారం. ఈ సినిమాలో ఆలీతో పాటు కొంతమంది ఆర్టిస్టులను సెలెక్ట్ చేయడంలో పవన్ పాత్ర ఉందని తెలిసింది. మనసుకు హత్తుకునే డైలాగ్స్ కోసం సాయిమాధ‌వ్‌ బుర్రా ను  అన్నకు తమ్ముడు సూచించాడని ఫిలిం నగర్ వర్గాల టాక్.

హీరోయిన్‌గా ఎవరిని తీసుకోవాలని రామ్ చరణ్ తల పట్టుకు కూర్చుంటే కాజ‌ల్‌ను తీసుకోమని పవర్ స్టార్ చెప్పాడంట. ఇవన్నీ చూస్తుంటే అన్నయ్యా సినిమాకు ఎక్కడ బ్రేక్ పడకుండా తమ్ముడు ఓ లుక్ వేస్తున్నాడని అర్ధమవుతోంది. వి.వి. వినాయక్ దర్శకత్వంలో రూపుదిద్దుకుంటున్న ఈ చిత్రం సంక్రాంతికి థియేటర్లలో సందడి చేయనుంది.