‘లైగర్‌’ సినిమా షూటింగ్‌ పూర్తవ్వడంతో ఆలస్యం ‘జేజీఎం’ (జన గణ మన) అనౌన్స్‌ చేశారు పూరి జగన్నాథ్‌ – విజయ్‌ దేవరకొండ. దాని కోసం పెద్ద ఈవెంటే ఏర్పాటు చేశారు. అయితే ఆ తర్వాత ఆ సినిమా గురించి ఎక్కడా ప్రస్తావన లేదు. సినిమా కథ ఎప్పుడో రెడీ అయిపోయింది. కథనం కూడా సిద్ధం చేశారని సమాచారం. దీంతో సినిమా కాస్టింగ్‌ గురించే వార్తలు బయటకు రావాల్సి ఉంది. కానీ అవేవీ వినిపించలేదు. ఎందుకబ్బా అనుకుంటుండగా హీరోయిన్‌ పేరు ఫిక్స్‌ అయినట్లు వార్తలొస్తున్నాయి.
‘జేజీఎం’ హీరోయిన్‌ ఖరారు అయిందని సమాచారం. దీని ద్వారా చాలా రోజులుగా అనుకుంటున్న విజయ్‌ దేవరకొండ – పూజా హెగ్డే కాంబినేషన్‌ సెట్‌ అయ్యిందట. అవును, ఎట్టకేలకు విజయ్‌తో బుట్టబొమ్మ సినిమా సెట్‌ అయ్యింది అంటున్నారు. దీంతో బాలీవుడ్‌ కుర్ర హీరోయిన్‌ నాయికగా ఉంటుందనే పుకార్లకు ఫుల్‌స్టాప్‌ పడినట్లే అని చెబుతున్నారు. జూన్‌ తొలి వారం నుండి సినిమా రెగ్యులర్‌ షూటింగ్‌ మొదలవుతుందని చాలా రోజుల నుండి వార్తలొస్తున్నాయి. ఆ షెడ్యూల్‌లోనే పూజ సినిమా టీమ్‌తో జాయిన్‌ అవుతుందట. ఆ రోజు సినిమాకు సంబంధించి అప్‌డేట్‌ కూడా వస్తుందంటున్నారు.
నిజానికి విజయ్‌తో పూజ హెగ్డే కాంబినేషన్‌ చాలా రోజుల క్రితమే అనుకున్నారు. అయితే అది ఐటెమ్‌ సాంగ్‌ కోసం. కానీ ఇప్పుడు ఏకంగా పూర్తి స్థాయి సినిమానే చేస్తోంది. వరుస పరాజాయాలతో మళ్లీ ఐరెన్‌ లెగ్‌ మార్క్‌ పడిపోతుందేమో అని పూజ ఫ్యాన్స్ ఆందోళన పడుతున్న సమయంలో ఇలా వరుస అవకాశాలు దక్కించుకోవడం పెద్ద విషయమే. ఇప్పటికే మహేష్‌ – త్రివిక్రమ్‌ సినిమా, ‘భవదీయుడు భగత్‌సింగ్‌’ చేస్తుండగా విజయ్‌ది కొత్త ప్రాజెక్ట్‌.
ఇక హిందీలోనూ వరుస అవకాశాలు అందిపుచ్చుకునే ప్రయత్నం చేస్తోంది. ప్రస్తుతం సల్మాన్‌ ఖాన్‌తో కలసి ‘కబీ ఈద్‌ కబీ దివాళీ’ అనే చిత్రంలో నటిస్తోంది. ముంబయిలో చిత్రీకరణ జరుపుకొంటున్న ఆ సినిమాతోపాటే, ‘జేజీఎం’ను కూడా చేయనుందట. అందుకు అనువుగా ముంబయిలోనే చిత్రీకరణ చేయడానికి పూరి జగన్నాథ్‌ అన్నీ సిద్ధం చేసినట్లు సమాచారం. పాన్‌ ఇండియా స్థాయిలో రూపొందుతున్న ‘జేజీఎం’లో విజయ్‌ దేవరకొండ సైనికాధికారిగా కనిపించనున్నాడు. ఇప్పటికే విడుదలైన కాన్సెప్ట్‌ పోస్టర్‌కు మంచి స్పందన వస్తోంది.
Most Recommended Video
పెళ్లొద్దు.. సినిమాలే ముద్దు… అంటున్న 12 మంది నటీనటులు వీరే..!
తమ సొంత పేర్లనే సినిమాల్లో పాత్రలకి పెట్టుకున్న హీరోల లిస్ట్..!
ఈ 11 హీరోయిన్ల కాంబోలు అనేక సినిమాల్లో రిపీట్ అయ్యాయి..!
