రాజమౌళి తన చిత్రాల విషయాల్లో ఎటువంటి సెంటిమెంట్స్ ఫాలో అవ్వరు. కానీ సినీ ప్రేక్షకులు అతనికో సెంటిమెంట్ ని ఆపాదించారు. అది ఏమిటంటే .. అతనితో సినిమా చేసిన హీరోకి నెక్స్ట్ సినిమా ఫెయిల్ అని నమ్మకం పెట్టుకున్నారు. సింహాద్రి చేసిన తర్వాత ఎన్టీఆర్ ఆంద్రవాలా అనే అపజయాన్ని చవిచూశారు. నేచురల్ స్టార్ నాని ఈగ సినిమా తర్వాత చేసిన ఏటో వెళ్లిపోయింది మనసు.. అడ్రస్ లేకుండా వెళ్లిపోయింది. ప్రభాస్ కూడా రాజమౌళి దర్శకత్వంలో ఇదివరకు ఛత్రపతి సినిమా చేశారు. దీని తర్వాత ప్రభాస్ చేసిన పౌర్ణమి మూవీ అభిమానుల మొహాల్లో వెలుగులను పంచలేకపోయింది. అందుకే జక్కన్న తో సినిమా చేసిన హీరో.. వెంటనే ఒక ప్లాప్ అందుకోవాల్సిందే అని ఫిక్స్ అయిపోయారు. ఈ సారి ఆ సెంటిమెంట్ ని ప్రభాస్ బ్రేక్ చేయాలనీ చూస్తున్నారు.
బాహుబలి చిత్రాల తర్వాత సుజీత్ దర్శకత్వంలో సాహో మూవీ చేస్తున్న సంగతి తెలిసిందే. ఈ మూవీ బాహుబలికి మించి విజయం సాధించాలని సంవత్సరం నుంచి కష్టపడుతున్నారు. ప్రతి సన్నివేశం ఆకట్టుకోవాలని శ్రమిస్తున్నారు. ప్రేక్షకులు థ్రిల్ ఫీల్ కావాలని డూప్ లేకుండా యాక్షన్ సీన్స్ చేస్తున్నారు. ప్రభాస్ మాత్రమే కాకుండా ఈ చిత్రం ఎంత ఆలస్యమైనా పరవాలేదు.. హిట్ మాత్రం తప్పనిసరి కావాలనే లక్ష్యంతో చిత్ర బృందం పనిచేస్తోందని సమాచారం. దీంతో రాజమౌళి సెంటిమెంటును ప్రభాస్ బ్రేక్ చేస్తారని అంటున్నారు.
