అభినేత్రి సీక్వెల్ పై సినీ ప్రియుల కామెంట్

కొన్ని సినిమాలు చూసినప్పుడు అప్పుడే అయిపోయిందా..? అనే ఫీలింగ్ కలుగుతుంది. ఇంకా కొంచెం ఉంటే బాగుంటుందని అనిపిస్తుంది. సీక్వెల్ తీస్తే చూద్దామని ఎదురుచూస్తుంటారు. కానీ ఫెయిల్ అయిన సినిమాకి సీక్వెల్ ని ఎవరూ కోరుకోరు. కానీ ఇప్పుడు విజయం సాధించని సినిమాకి సీక్వెల్ తీసే ఆలోచనలో పడ్డారు. వారు ఎవరో కాదు అభినేత్రి దర్శకుడు ఏ ఎల్ విజయ్. ఇతను ప్రభుదేవా, తమన్నా, సోనూసూద్ లతో మూడు భాషల్లో ఈ చిత్రాన్ని తెరకెక్కించారు. ఇది తమిళంలో ఓ మోస్తరు విజయాన్ని అందుకుంది. ఇక హిందీ, తెలుగులో అంతగా ఆడలేదు. అయినా దీనికి సీక్వెల్ కథని రెడీ చేశారు.

ప్రభుదేవా, తమన్నా లకు కథను చెప్పి ఒప్పించారని తెలిసింది. స్క్రిప్ట్ ని చక్కగా మలిచే పనిలో డైరక్టర్ ఉన్నట్టు కోలీవుడ్ వర్గాల వారు తెలిపారు. అభినేత్రి 2 టైటిల్ ని కూడా రిజిస్టర్ చేయించినట్లు సమాచారం. ఇది తెలిసి కొంతమంది నెటిజనులు “ప్లాప్ సినిమాకు సీక్వెల్ అవసరమా? ” అంటూ కామెంట్స్ చేస్తున్నారు. ఎంతమంది విమర్శించినా.. వారందరూ ప్రశంసించేలా సినిమాని తీయాలని డైరక్టర్ సంకల్పంతో ఉన్నారు. ఇది వరకు నిర్మాణంలో సోనూసూద్, ప్రభుదేవా భాగం పంచుకున్నారు. మరి సీక్వెల్ కి కూడా డబ్బులు పెడతారా? అనేది ఇంకా స్పష్టత రాలేదు.