తెలుగులో నవ్వించిన సినిమాలు వచ్చాయి. భయపెట్టిన సినిమాలు వచ్చాయి. కానీ తొలిసారిగా భయపెడుతూ నవ్వించిన మూవీ “ప్రేమకథా చిత్రమ్”. కొత్త జాన్రా లో తెరకెక్కిన ఈ సినిమా ప్రేక్షకులకు పూర్తి వినోదాన్ని పంచింది. సుధీర్ బాబు, నందిత హీరో హీరోయిన్లుగా నటించిన ఈ సినిమాకి కథ మారుతి అందించగా.. జె ప్రభాకర్‌ దర్శకత్వం వహించారు. లో బడ్జెట్ రూపుదిద్దుకున్న ఈ సినిమా మంచి కలక్షన్స్ రాబట్టింది. అందుకే ఈ చిత్రానికి సీక్వెల్ తీయాలని అనుకుంటున్నారు. సీక్వెల్ అనగానే ఆ హీరో, డైరక్టర్ ఉండడం కామన్. కానీ “ప్రేమకథా చిత్రమ్ 2” మాత్రం కొత్త టీమ్ తో తెరకెక్కబోతోంది. హరి కిషన్‌ దర్శకుడిగా పరిచయం అవుతున్నారు.
హీరోగా సుమంత్ అశ్విన్‌ నటించబోతున్నారు. అతనికి జోడీగా ఇద్దరు హీరోయిన్లు నటించనున్నారు. సిద్ధి ఇద్నాని (జంబ లకిడి పంబ ఫేం), నందిత శ్వేత (ఎక్కడికి పోతావు చిన్నావాడా ఫేం)లు సుమంత్ అశ్విన్‌ తో రొమాన్స్ చేయబోతున్నారు. రొమాన్స్ కె పరిమితమవుతారా? లేకుంటే భయపెట్టి నవ్విస్తారా? అనేది ఇప్పుడే చెప్పలేము. ప్రేమకథా చిత్రమ్ మూవీ నిర్మించిన సుదర్శన్‌ రెడ్డి సీక్వెల్‌ను కూడా నిర్మిస్తున్నారు. ఈ సినిమా ఎలా ఉండబోతుందోనని ఫిలింనగర్ వాసులు ఆసక్తిగా చర్చించుకుంటున్నారు.
