మా ఆయన బ్రెయిన్ షార్ప్ – ప్రియమణి

మే నెలాఖరున ముస్తఫా రాజ్ తో ప్రియమణి నిశ్చితార్థం జరిగిన సంగతి తెలిసిందే. అంతలోనే తనకు కాబోయే భర్త గురించి తెగ పొగిడేస్తోంది ఈ నటీమణి. ముఖ్యంగా తెలివి తేటల్లో ముస్తఫా ముందంజలో ఉంటాడని సర్టిఫికెట్ ఇచ్చేసింది. నాలుగేళ్ల క్రితం సెలబ్రిటీ క్రికెట్ లీగ్ సమయంలో ఏర్పడ్డ వీరి పరిచయం తొలుత స్నేహంగా, ఆపై ప్రేమగా రూపాంతరం చెంది ఇప్పుడు పెళ్లి వరకు తీసుకొచ్చింది. ఆ అనుభవంతోనే ముస్తఫా తెలివి తేటల గురించి ఈ విధంగా చెప్పుకొచ్చిని ప్రియమణి.ప్రియమణికి జలియన్ వాలా బాగ్, అమృతసర్ లోని గోల్డెన్ టెంపుల్ చూడాలని కోరిక ఉండేదట. ఆ కోరిక తీర్చుకునేందుకు గతేడాది టూర్ వేసిన ఈ జంట వాగా (పంజాబ్ లోని అమృతసర్, పంజాబ్ (పాకిస్థాన్) లోని లాహోర్ సరిహద్దు ప్రాంతం) చూడటానికి వెళ్లారట.

అక్కడ జరిగే సైనికుల కవాతు చూసేందుకు జనాలు పెద్ద సంఖ్యలో వస్తారట.సాయంత్రం జరిగే ఈ కవాతు చూడాలంటే మధ్యాహ్నానికల్లా అక్కడికి చేరుకోవాల్సిందే. దీనికోసం రెండు రకాల టిక్కెట్లు అమ్ముతారు. అందులో ప్రియమణి సాధారణ టికెట్స్ తీసుకుందట. అయితే వీరు కూర్చున్న చోటు నుండి అది చాలా దూరంగా ఉంది. దాంతో ప్రియమణి – ప్రియుడు ముస్తఫా అక్కడి అధికారులతో మంతనాలు జరిపి దగ్గర చూసేందుకు అనుమతి తీసున్నాడట. అదీ ప్రియమణి పేరు చెప్పే (జాతీయ అవార్డు గౌరవం ఉంది మరి). ఇలా చాలా విషయాల్లో ముస్తాఫా తన తెలివి తేటలను ప్రదర్శిస్తుంటాడని పొంగిపోయింది ప్రియమణి. తన తండ్రి, సోదరుడు నడుపుతున్న వ్యాపారంలోనూ వారికి సలహాలు ఇస్తుంటాడట. ఇక నిఖా ఎప్పుడంటే ఓ ఏడాదిలో వుండొచ్చంటూ సిగ్గులమొగ్గ అయిపోయింది ఈ సుందరి.