టెంపర్ విజయాన్ని గుర్తు చేసుకున్న పూరి జగన్నాథ్

ఇడియట్.. అమ్మానాన్న తమిళ అమ్మాయి.. పోకిరి వంటి సూపర్ హిట్స్ తెరకెక్కించిన పూరి జగన్నాథ్ కి బిజినెస్ మ్యాన్ సినిమా తర్వాత విజయం దోబూచులాడింది. మళ్ళీ టెంపర్ తో తన డైరక్షన్ పవర్ ని చూపించారు. యంగ్ టైగర్ ఎన్టీఆర్ హీరోగా నటించిన ఈ మూవీ రికార్డులను తిరగరాసింది. ఎన్టీఆర్, పూరి… ఇద్దరికీ ఈ హిట్ మంచి మైలేజీని ఇచ్చింది. అందుకే ఈ సినిమా అంటే పూరి జగన్నాథ్ కి బాగా ఇష్టం. ఈ సినిమా విడుదలై మూడేళ్లు పూర్తయిన సందర్భంగా దర్శకుడు పూరి జగన్నాథ్ తన ఆనందాన్ని అభిమానులతో పంచుకున్నారు. “‘టెంపర్‌.. నా సినిమాల జాబితాలో గర్వంగా చెప్పుకునే సినిమా.

నటుడిగా తారక్ నాకు ఎంతో ప్రేరణ ఇచ్చాడు. కథ అందించిన వక్కంతం వంశీకి, ఘనవిజయాన్ని అందించిన అభిమానులకు కృతజ్ఞతలు” అంటూ ట్వీట్‌ చేశారు. ప్రస్తుతం పూరి తన తనయుడు ఆకాష్‌ను హీరోగా రీ లాంచ్‌ చేసే పనిలో బిజీగా ఉన్నారు. భారత్‌ పాక్‌ల యుద్ధ నేపథ్యంలో సాగే కథతో మెహబూబా సినిమాను తెరకెక్కిస్తున్నారు. నేహా శెట్టి హీరోయిన్ గా నటిస్తున్న ఈ చిత్రం టీజర్ ఫిబ్రవరి 9న రిలీజ్ అయి విశేషంగా ఆకట్టుకుంది. పూరి జగన్నాథ్‌ టూరింగ్‌ టాకీస్‌ పతాకంపై రూపొందుతున్న ఈ చిత్రం వేసవిలో రిలీజ్ కానుంది.